Vi fann 2404 artiklar i dette arkivet.
Ståle Ansnes i Todalen Idrettslag sitt driftsstyre vinteranlegg fortel at det no er nypreparerte løypetrasear i lysløypa på Tjønnmyra. Det er meldt meir snø utover ettermiddagen og kvelden, og driftsstyret vil preparere løypetraseane fortløpande framover.
Laurdag 20.mars mellom klokka 12:00 – 16:00 arrangerer Indre Nordmøre forsvarsforening (INF) Skiskytingas Dag på Gravvold i Bæverfjord. INF vil i samband med arrangementet ha eit introduksjonskurs for nybyrjarar.
Siri Skjerve skal i perioden 25.mars – 25.april ha separatutstilling på Møre og Romsdal kunstsenter i Molde. Utstillinga har ho kalla «As We Evolve». Siri lagar skulpturar av tradisjonsgarva skinn som er bearbeidd til mellom anna feittgarva skinn, råhud og pelsskinn. At skinna er tradisjonsgarva inneber at dei ikkje er industrielt garva. Siri nyttar Jutulskinn i Vågå til garvinga av skinna ho brukar, og saumar skulpturar med voksa lintråd. Skinna i skulpturane til utstillinga i Molde, er stort sett frå lokale jaktlag i Todalen, og Siri vil nytte høvet til å takke jaktlaga for leveransane.
Mykje lokal nedbør og vind fører til auka snøskredfare i Trollheimen, melder NVE på si varslingsteneste Varsom.no. Laurdag er det meldt raudt farenivå for Trollheimen. Vær difor forsiktig i leområder og terrengformasjonar der vinden legg frå seg ustabile nysnøflak.
I dag er det nøyaktig 79 år sia eit engelsk overvakingsfly, på oppdrag for å fotografere krigsskipet Tirpitz i Trondheimsfjorden, vart skote ned over Nordmarka. Flyet, eit Spitfirefly (med kallenamn AA180), krasja ikkje så langt frå Andersvatnet.
Anne Marie Rognskog og Sissel Halset Storslett har, i samband med kvinnedagen 8.mars, teke initiativ til ei Pop Up-utstilling i Finstua i Surnadal kulturhus 8.mars klokka 17:00 – 20:00. Tanken er å fylle Finstua med arbeider/kunstverk laga av kvinner i distriktet.
Fredag 5.mars mellom klokka 13:00 – 18:00 er det duka for gardsutsal av bakevarer hos Lia Gard. Innehavar Monica Moen Kvendset fortel at det vil bli mogleg å få kjøpt: ferske smultringar, skulebollar, grovbrød, osteloff og havrekjeks. Så her er det noko for ein kvar smak, inn mot helga!
Som mange sikkert har fått med seg dei siste dagane, så har Regjeringa, etter råd frå Folkehelseinstituttet, endra litt på tildelingsprioriteringane av koronavaksiner. Endringane får ikkje dei store konsekvensane for vaksineringstempoet i Surnadal kommune. I ei pressemelding frå kommunen no i dag, orienterer kommuneoverlegen om kva dei nye tildelingsprioriteringane vil bety for Surnadal kommune.
10.mars 2020 opna Surnadal Frivilligsentral dørene for første gong. I samband med 1-årsjubileet vil frivilligsentralen ha ope hus torsdagane 11., 18. og 25.mars, i tidsrommet 11:00 – 15:00. Janne Skei vil ha desse dagane fotoutstilling i lokala til Frivilligsentralen, og det vil bli sal av kaffe og kaker.
Torsdag 9.mars klokka 20:00 har Nordvik Grendalag årsmøte i forsamlingshuset. På grunn av koronasituasjonen ønsker grendalaget at folk melder seg på til årsmøtet. Påmelding skal sendast på SMS til Tonje Kristin Vikan på telefon 918 64 878 innan fredag 5.mars.
I ei felles pressemelding frå ALTI Forvaltning og Malme AS, blir det kunngjort at ALTI Forvaltning og Malme AS inngår avtale om utvikling og forvaltning av Vestnes Brygge. Vestnes Brygge ligg sentralt plassert i Vestnes, midt mellom Molde og Ålesund. Vestnes har eit kompakt sentrum med mange butikkar i gåavstand. Vegg i vegg med senteret ligg Sport!, Europris og Bunnpris, forutan fleire leilegheitskompleks, treningssenter og båthamn. Avtalen som er inngått tredde i kraft 1.mars, altså frå i går.
Det milde vêret den siste veka har smelta mesteparten av snøen i løypetraseane i lysløypa på Tjønnmyra, fortel Ola Dalsegg, leiar i Brne- og ungdomsgruppa i Todalen Idrettslag. Dette gjer at Barne- og ungdomsgruppa ser seg nødt til å avlyse morgondagens «Barn i løypa».