Vi fann 2322 artiklar i dette arkivet.
Økonomi og markedsgruppa i Todalen Idrettslag melder at det framleis er nokre thermodrikkeflasker att for sal. Om du er interessert i å kjøpe, kan du ta kontakt med:
Ingunn Mikkelsen, på telefon: 918 29 206 eller
Jenny Stensby, på telefon 416 24 991
Jula 1991 fekk Jo Gjeldnes eit rosa klatretau med sele av Gunnar Nordvik til jul. Det vart starten på ein luftig hobby. Gunnar hadde sjølv allereie klatra litt og hadde teke fleire kurs, både i klatring og sikring. Frå etterjulsvinteren 1993 tok han med seg Jo Gjeldnes, Rune Halset, Gudmund Kårvatn og Ingvild Kårvatn, på klatring rundt om kring. På vinteren var det klatring innomhus i Surnadal og Rindal. Når våren kom vart klatringa flytta utomhus. Gunnar fekk laga klatreveggar på vestveggen på redskapshuset på Bordholmen og på siloveggen på Kårvatn. Her fekk Jo, Rune, Gudmund og Ingvild lære både å klatre, og ikkje minst å sikre kvarander under klatringa. Frå våren og utover vart klatringa flytta til forskjellege fjellveggar, og vart både luftigare og ikkje minst meir utfordrande.
Torsdag 31.desember klokka 16:00 blir det nyttårskveldsgudsteneste i Todalen kyrkje. Liturg er Kristin Strand medan Ronny Kjøsen er organist. Takkoffer til kyrkjelydsarbeidet, Vipps 506908. Nye smittevernreglar gjer at det likevel må vere påmelding til nyttårskveldsgudstenesta, slik det var på julekveldsgudstenesta.
Onsdag 23.desember, ved midnatt, var årets storviltjakt slutt. Så no blir det pause fram til den 1.september for storviltjegerane. Dei oppdaterte tala syner at det i Todalen er skote totalt 60 dyr. Det er skote 40 hjortar, 5 elgar og 15 rådyr. Dei tilsvarande tala i 2019 var 35 hjort, 2 elgar og 13 rådyr. Det betyr at det i år er skote totalt 10 dyr meir enn i fjor.
Frå anleggsleiar på Tjønnmyra, Ståle Ansnes, har vi fått opplyst at det no er nypreparerte løyper i lysløypa på Tjønnmyra. Han seier det er kjempefine forhold og at sporet er som «trikkeskinner». Så da skulle det vere skikkeleg fine forhold for ein skitur no i romjula.
Ekteparet Palmer og Anna Britt Vikan overtok begravelsesbyrået fra Ragna og Ivar Meisingset i 2014, som starta opp Surnadal og Rindal begravelsesbyrå i 1978. No 42 år etter oppstarten så er ein ny og spennande epoke klar. I løpet av vinteren neste år er det Bjørn Vevang som overtek ansvaret for drifta vidare. Bjørn kjenner dei fleste som organist i kyrkja, men no vil fleire stifte bekjentskap med Bjørn som representant og dagleg leiar i begravelsebyrået.
Bygging og pynting av pepparkakehus er ein vanleg førjulsaktivitet rundt om. Tysdag kveld hadde Marit Ingeborg invitert to av søskenbarna sine, Van Adrian og Jens Sancho, til «Bygge-dugnad» på langbordet i Øya. Pepparkakehuset var eit «elementbygg», ikkje frå TalgøMøretre denne gongen, men frå Matkroken Todalen.
Etter at vi i ettermiddag, med bakgrunn i ei pressemelding frå kommuneoverlegen i Surnadal kommune, skreiv at det ikkje var nye tilfeller av Covid19-smitta eller at det gjekk føre seg smittesporing i kommunen, har vi no klokka 21:14 fått melding frå kommuneoverlegen om at fem personar, heimehøyrande i Surnadal kommune, er sett i karantene. Bakgrunnen for at desse er sett i karantene er smittesporing som går føre seg i Kristiansund kommune, etter at ein person der har testa positivt på Covid19.
Det er per no ikkje påvist nye Covid19-smitta i Surnadal kommune, og det er som følge av dette ingen pågåande smittesporing no rett før jul, opplyser kommuneoverlegen i ei pressemelding no på ettermiddagen. I pressemeldinga seier kommuneoverlegen følgande: «Det går mot ei etterlengta julefeiring for store og små. Håpet er at vi skal kunne møtast i trygge rammer og halde avstand, samtidig som vi har det triveleg i lag med våre nermaste».
Søyaposten 2020 er komen. Her blir alle årsrapportane for Søya/Todalen sine fotballag i 2020 presentert. Ein «liten» glipp gjer at Søya/Todalen G9/10 sin årsrapport ikkje har blitt med i årets utgåve av Søyaposten. Dette er slikt som kan skje. Som eit lite «plaster på såret» så presenterer vi årsrapporten til G9/10 her.
Todalen Sokneråd opplyser at det framleis er ledige plassar til julekveldsgudstenesta i Todalen kyrkje klokka 14:00. På grunn av Koronasituasjonen må alle som ønsker å komme til kyrkja julekvelden melde seg på, og det er plass til berre 50 personar. Så om du ikkje har meldt deg på endå, men har tenkt deg til kyrkja denne kvelden, så er det altså framleis ledige plassar.
På grunn av Koronasituasjonen arrangerer juletrefestkomiteen på Nordvik rebusløp i staden for den tradisjonelle juletrefesta i år. Rebusløpet blir arrangert laurdag 26.desember. Rebusløpet har start ved Nordvik forsamlingshus mellom klokka 12:00 – 14:00. Juletrefestkomiteen skriv at dei vil sende av garde små grupper/familiar om gongen slik at folk blir mest mogleg spreidd under rebusløpet.