Vi fann 7128 artiklar i dette arkivet.
På tide å skifte frå vintersko til lettare sommarsko – Todalen Mjølk reknar med at vinteren og snøvêret er over for i år og setter på sommarhjul for å gjera klart til våronna. På primstaven er det da 14. april som er første sommardagen på «sommarsida» og når meteorologane spår sommartemperaturar for heile 10-dagersperioden så er vel ikkje hjulskifte noko å vente med.
Det var eit kjempefint innslag frå WC i randonee i Tromsø – dagens idividuelle konkurranse hadde 62 deltakarar i seniorklassen for mann, og dagens vinnar i seniorklassen vart Remi Bonnet frå Sveits på tida 1:05:02,67. Beste nordmann vart Hans Inge Klette på 16.-plass, medan Trym Dalset Lødøen kom på 22.-plass. Erik Kårvatn gjorde og eit kjempeløp og kom på 28. plass på tida 1:17:00,10. «Solid for ein unggut som enno har mykje å lære å kome inn på topp 30-lista», var kommentaren til NRK-reportaren.
Tysdag 18. april er det ny balldag på Todalshytta – som tidlegare er det fritt val mellom sildball med stekt flesk og potetball med saltkjøtt som tilbehør. Serveringa startar frå kl 15:00 og går heilt fram til kl 18:00. Bestill gjerne på epost arve@todalshytta.no eller på SMS/telefon 929 97 550.
No er det mykje hjort på innmarka – reknar med at den varme fønvinden har sett fart på nygrøå på innmarka, og det er nok «furkunnmat» for hjorten. Astrid Longva Kvendset har var på hjortesafari torsdag kveld, og har sendt oss bilder av fangsten ho gjorde. Tilsaman var det rundt 40 dyr – 30 på Ørsalhøgda, 5 i den gamle lysløypa og 5 mellom Oddøya og Halsabrua.
I dag er det julaftan og 17. mai på ein gong for randonee. For første gong i historia blir ein individuell randonee-konkurranse sendt direkte på Norsk TV, og da er det sjølvsagt NRK1 som gjer det. Det blir totalt 17 kamera/droner som blir bruka i TV produksjonen. Sendinga startar kl 13.15, start damer kl 13.30 og start herrer kl 15.20.
I samband med konfirmasjonsførebuinga inviterer konfirmantane no til messe i Åsskard kyrkje tysdag 18. april kl 19:00. Prest Torbjørn Brøske har i vinter stort sett undervist 15-åringane i deira eigne kyrkjer, Åsskard og skiftesvis Stangvik eller Todalen. Saman med han har konfirmantane i dei tre sokna øvd inn «Sju akter frå Jesu liv». Med sceneprega framføring av sentrale bibeltekster er dei hovudaktørar i tysdagens såkalla samtalegudsteneste.
Rolf Langvatn som gjennom eit langt liv har vore viltforskar, der han i hovudsak har forske på hjort ved Songli forsøksgard i Orkland. Han la for dagen ein enorm kunnskap om forvaltning av hjorteviltet, og formidla det til dei frammøtte i Todalen ungdomshus. Surnadal Jeger- og fiskerforening overraska nok forsamlinga litt, da leiar Turid Settem Eggen tok ordet og nytta høvet til å utnemne Ragnar Halle som æresmedlem i Surnadal JFF og overrekte eit synleg bevis for heideren.
Denne veka er det verdscup i randonee i Tromsø – i dag er det vertikal som står på programmet og her står sjølvsagt det norske landslaget på strartstreken – medrekna todalingen Erik Kårvatn som denne gongen startar i seniorklassen. Dermed får han måle kreftene med dei aller sterkaste denne gongen.
Da friluftsgudstenesta på Tjønnmyran runda av med Todalssongen kom det nokre få regndråpar for å markere slutten på det fine påskevêret vi har hatt. Det var Todalen sokneråd som tradisjonen tru arrangerte friluftsgudsteneste 2. påskedag, og det er faktisk ein like gamal tradisjon at det er finvêr under friluftsgudstenesta. Mellom 50 og 60 personar var møtt fram og hadde installert seg i gapahuken på Tjønnmyra for å ta del i friluftsgudstenesta.
Ei lita overrasking og eit ønske om å ha ein fin dag hong urørt på eit skilt i Toåa tursti i dag tidleg. Ei lita anonym helsing til ein like anonym finnar – vi opna ikkje så vi veit ikkje kva som stod, men vi skulle kanskje vore dyktigare til å ønskje kvarandre ein god dag, eller eit ønskje om godt vêr.
14 lag mobliserte all tilgjengeleg kunnskap til påskequiz på Todalshytta langfredagskvelden, og jammen vart det kamp om posisjonane for ikkje å seie pallplassane etter kvart. Til slutt var det 4 poeng som sørga for ein trygg vinnarplass for det lokale laget Markarampen med 45 poeng. På dei neste plassane kom Ranes United med 41 poeng og Torkjel & Co på tredjeplass med 40,5 poeng.
Påskeaftan kan du rivi i med nytt utstyr – så kan du ta ein prøvetur til Tydalsnebba etterpå – eller kanskje ein tur til Kvennåbotn? Kårvatn Fjellutstyr rapporterer om eventyrleg sal og har i år ope påskeaftan i tidsrommet 10-15 – Da er det rabatt på det meste i «butikken på låven» – ski, bindinger, […]