Forside Arkiv

Natt til torsdag har vi hatt dei lågaste temperaturane så langt i vinter.  På Kårvatn vart det registrert -22, og rundt bygda er det iallfall registrert temperatur tett opp til 20-talet.  På vêrmeldinga til yr.no ser det ut til at vi må være førebudd på meir kulde – iallfall fram til neste helg. 

Den siste tida er det mange som har vore utom kanten på vegen mellom Todalskrysset og Todalen.  Etter det siste snøfallet er det fleire som har vore i grøfta, og det er grunn til å åtvare mot å kome for langt utpå kanten når du kjører på strekninga.

Måndag 1. februa er første dag i årets gaupejakt.  Under årets kvotejak kan det her i fylket felles 4 dyr – eit dyr i felles delområde A; Tingvoll og deler av Sunndal, medan 3 dyr kan fellast i delområde B som er resten av forvaltningsområdet – Surnadal og gamle Aure.

Vi har fått melding frå Knut Bergli i Todalen Idrettslag si Barne- og ungdomsgruppe der han melder om fine forhold på skeiseisen på Bordholmen stadion. Parkeringsplassen og brøyta, slik at det er mogleg å parkere for dei som kjem køyrande. 

Frå skannarpatrulja i Todalen historielag har vi fått tilsendt interessante og fine bilete frå bryllaupsfeiring i Todalen på 1940/50-talet. Stor takk til Ingri og Ragnhild!

Remidt melder at det blir ny ordning med leveringa av avfall i løpet av året.  Vi har tidlegare 2 dunkar og ein sekk – no får vi to nye dunkar for å kjeldesortere i.  Dei nye dunkane skal brukast til matavfall og ein til glas og metall. Målet er at det skal bli mindre restavfall som skal brennast og meir utsorter avfall til gjenvinning. 

Todalen sanitetsforening melder at det blir årsmøte torsdag 25. februar kl. 18.30 i Todalen sanitetshus.

Påmelding

Mest truleg blir KNT kjøpar av Innerdal Turisthytte, når Iver og Torill Innerdal no vil selje Innerdalshytta – som er livsverket deira i Innerdalen. Kjøpar blir KNT – Kristiansund og Nordmøre turistforening, dersom ekstraordinært årsmøte den 8. februar gjev si godkjenning. Kjøp av Innerdalshytta er einaste sak på dagsorden.

Ei rumpetaske for skismøring vart torsdag funne på strekninga mellom Todalskysset og Todalen  – og er levert inn som hittegods hos Matkroken i Todalen.   Er det du som har mista utstyret så er det berre å stikke innom butikken så kan det ligge an til gjenforening!

I ein epost frå Monika Klungervik, ved Rossåa settefiskanlegg, har vi fått eit referat frå gårsdagens planting av augerogn i Toåa ovanfor Ramsøya. Augerogn er laksefoster som har fått synlege auger. Tida det tek frå stryking, som skjer i oktober, og fram til det har blitt augerogn, tek rundt 220 DGR (døgngrader) og er såleis direkte påverka av temperaturen i vatnet i elva. Vanlegvis skjer plantinga av augerogn i Toåa i slutten av februar eller i starten av mars. Sidan temperaturen i Rossåa siden oktober har vore høgare enn vanleg, har augerogna vokse raskare og årets planting vart difor 1-1,5 månad tidlegare enn vanleg. 

Hos Norsk Tipping er det høve til å tilgodesjå lag og organisasjonar med ein såkalla grasrotandel. Det er du sjølv som bestemmer kven som skal tilgodesjåast, og det er 7,5% av speleomsetninga hos Norsk Tipping som blir bruka på den måten. Lag og organisasjonar kan registrere seg hos Norsk Tipping og bli godkjent som mottakar av grasrotandelen.  Her i Todalen er det Todalen Idrettslag som toppar tabellen, og tok i mot kr 39.160 i grasrotandel i fjor. 

På regjeringas pressekonferanse i dag vart vi informert om at dei vidarefører dei fleste tiltaka for å begrense smittefarenn.  Men det blir gjort enkelte endringar for å lette på enkelte tiltak – mellom anna blir det atter høve til å ta i mot besøk heime med inntil 5 personar dersom du har plass.  Men 1-metersregelen gjeld framleis!