Arkiv for oktober, 2022

I går kveld hadde styret i Todalen Idrettslag kalla inn sine medlemmar til medlemsmøte i Todalen ungdomshus. Bakgrunnen for møtet, var at styret i idrettslaget, ønskte å høyre kva for aktivitetar medlemmane ønsker at idrettslaget skal drive med i framtida og korleis desse skal organiserast. Knapt tretti medlemmar møtte opp. «Det vart eit positivt møte med mange gode diskusjonar og innspel», sa leiar i idrettslaget Elinor Bolme etter møtet. «Vi fekk mange gode innspel og forslag, som styret no skal arbeide vidare med fram mot årsmøtet neste år», la ho til.

I dag startar tradisjonelt haustsal ved butikken på Kårvatn – det skjer for å frigjere plass til nyheiter som er på veg inn.  No skal lagret og butikken ryddast, og det er særdeles mange godbitar til sterkt reduserte prisar! Mykje klede, sko, turutstyr, skiutstyr…. Vi opnar haustaget i butikken i morgon!!  – Men utvalet finn du også […]

Fredag 14. oktober er Stangvik kyrkje arena for ein unik kyrkjetonekveld. Tenorperler, orgelmusikk, kor og nye salmetonar står på programmet. Tenorsolist Harald Bjørkøy og musikkskapar Ole Karsten Sundlisæter er P17-korets gjester med eit smakfullt program.

På garden Jostua Bele i Bæverfjorden har Solveig Haglund og Helga Bele eit unikt tilbod til personar som har demenssjukkdom. På møtet i Todalen sanitets forening tysdag kveld orienterte dei to engasjerte og positive kvinnene om prosjektet Inn på tunet.

På grunn av omlegging til nytt datasystem vil Surnadal legesenter vere heilt stengt tysdag 11. oktober. Legevakta (116117) vil vere operativ. Ved akutt fare for liv og helse ring 113. 

Tysdag 4. oktober er det altså balldag igjen på Todalshytta.  Arve Evensen fortel at det har vore ein travel haust og stor aktivitet på Todalshytta, sjølv om sesongslutt forlengst er passert. Tysdag er det imidlertid duka for ny balldag, og som vanleg er det fritt val om du vil ha potetball med tilbehør, eller kanskje du likar betre  sildball med stekt bacon – valet er ditt, seier Arve.

Søndag 9. oktober klokka 13:00 inviterer Svinviks arboret til foredrag og kunstutstilling i arboretet. På programmet står: «Invasiv rododendron i Norge – hybridisering, tilpasning, utbrudd og tiltak». Populærvitenskapeleg foredrag med forskar Duncan Halley frå NINA, Norsk institutt for naturforsking. Kafeen er også open, og her kan du få kjøpt kaffe og eplekake. Klokka 14:30 opnar salsutsilling, med den lokale kunstnaren Sissel Halset Storslett, dørene i fjøset i arboretet. 

Stavganggruppa i Surnadal Pensjonistlag inviterer torsdag 6. oktober klokka 11:00 til stavgangtur til Øygardshalsen. Oppmøte på og parkering ved I.L. Søya sitt klubbhus ved Vang skisenter. 

Todalen sokneråd inviterer til gudsteneste, saman med årets 50-års jubilantar, i Todalen kyrkje søndag 9. oktober klokka 11:00. Her vil også neste års konfirmantar bli presentert. Liturg er Torbjørn Brøske, medan Bernt Bøe er organist. 

Fjord 1 melder at det blir redusert kapasitet på ferjeavgangen frå Rykkjem til Kvanne klokka 11.45 måndag føremiddag. Dette på grunn av  transport av farleg last. På denne avgangen er det kun tillatt opp til 12 passasjerar. 

Surnadal kommune fornyar avtale om støtte til nærbutikkane i kommunen.  Det er Coop-butikken i Bøfjorden, Matkroken Bæverfjord og Matkroken Todalen som blir omfatta av denne avtalen. Avtalen går ut på å plassere ut ein infoskjerm i butikkane, der kommunen formidlar nytt frå kommunen og frå lokale media. 

Tykkjer du at det var for lite sol i sommar? Da har du no sjansen til å kjøpe deg eit solarium, for å bøte litt på dette! Todalen Idrettslag skal nemleg selge solariumet som har stått på Hett & Svett. Solariumet er av typen Sunvision, og ligg ute på finn.no til kroner 4.800,-.