Vi fann 7102 artiklar i dette arkivet.
Har enno til gode å treffe den personen som ikkje likar nystekte bakels, og den trefte vi heller ikkje i dag. Det var nok ei hyggeleg overrasking å bli påspandert bakels til kaffen på Matkroken i dag. Alt frå starten var det god respons da dagens 10-kaffe fekk ekstraforpleining med handelmann Nordvik.
Værmeldinga har liksom ikkje stått i forhold til værvarslet så langt i dag. Men det har vore skikkeleg stormflod, slik som meldt, og dermed oversvømming på mange plassar i flodmålet på Kvennset, Småbåthamna, Bordholmen, Halsetøran og på Ansnessaga. Vindretninga skal også dreie meir mot nord-vest og blir da kanskje meir rett inn fjordane.
For Rute 46 Kvanne – Rykkjem har Fjord1 sendt ut følgande melding: På grunn av dårlig vær er ruten inntil videre innstilt. Seinare – i 15.30 tida – er det meldt at trafikken på strekninga er komen i gang igjen, men at forsinkinger kan påreknast.
Når feiebilen dukkar opp, da er det som eit teikn på at våren er i anmarsj. Torsdag var Mesta ute med feiebilen, og vaska, pussa og støvsuga vegkantar langs FV671 inn til Todalen. Det blir mykje støv og lort i samband med strøing og salting gjennom ein lang vinter.
Indre Nordmøre Senioruniversitet har møte på Kulturhuset i Surnadal onsdag 27.mars 2019 kl 1100. På programmet står Anne Vognild Einum, som fortel om hobbyen sin og viser bilde under tittelen «Ein farfar i livet – – – «. Kaffe og kake – Billettpris: kr 100 / 150 – og sjølvsagt er alle velkomne!
Stig Husby er styreleiar i Todalen.no på 2. året, og begynner no å bli varm i trøya. Eit lite underskot i 2018 sette eit lite støkk i styreleiaren, og gjer at styret no set i verk tiltak for å sikre årets budsjett og for å legge eit betre økonomisk fundament for framtida. – For ein ting er sikkert, seier Husby, og det er at nyheiter kostar. Det kostar pengar å drive nyheitsformidling, sjølv om det meste av arbeidsinnsatsen har eit sterkt dugnadspreg. No oppfordrar styret i Todalen.no dei 1300 daglege lesarane til å bli med som støttemedlemar – og det kostar ikkje meir enn ein 200-lapp for året!
Når søskenpara Hemsing og Larsen slår seg saman, ligg det an til ei gnistrande konsertoppleving i Surnadal kulturhus 25. mars. Dei blir kvar for seg rekna mellom dei ypperste musikarane på sine felt, og summen av samspelet mangedoblar opplevinga, skal vi tru dei som har hørt desse fire før. Måndag vil «To damer, to herrer» presentere eit program som vekslar mellom folkemusikk frå Valdres og Trøndelag til verk av Bach, Ole Bull og deira eigen Gjermund Larsen
Det er faktisk 195 betalande medlemar i Todalen historielag. Mellom 30 og 40 av dei deltok på lagets årsmøte i Todalen ungdomshus i kveld, og det er jammen bra når ein samanliknar med andre lag og organisasjonar. Todalen historielag er aktivt gjennom heile året, og aktiviserer mange i arbeidet med å samle og sikre bygdehistoria vår.
Todalen idrettslag avviklar sitt årsmøte i Todalen ungdomshus onsdag 27. mars. No er saklista klar, og blir offentleggjort her på Todalen.no. Den inneheld stort sett vanlege årsmøtesaker som årsmeldingar, rekneskap, val, vurdering av medlemskontingenten og driftsbudsjett for 2019.
I helga var det midt norsk mesterskap i Taekwon-do i Rosenborghallen i Trondheim. Surnadal Taekwon-do klubb er i siget no, og gjorde det bra i helga også, skriv klubben i ei pressemelding.
I helga har Surnadal I.L. freeski/alpint stått som arrangør av «Pipelife Show & Style» som har gått over 2 dager, men litt trening og uhøgtidleg finpuss av forma på laurdag, da også arrangement i kulturhuset var ein del av programmet. Søndag var det klart for «Slopstyle Show And Style» i Sæterlia Snowpark som er det 4. av 4 renn i Midt-Norge i vinter. 37 deltakarar stilte på startstreken, og viste imponerande egenskaper på ski – berre så synd at det var iskald vind med snøfokk det meste av arrangementet.
På Skihytta er det i helga arrangert vinterblot, og dagens øving har vore skiskyting med internasjonal deltaking. Resultatlista understrekar kor suveren Norge er i denne sporten, der dei beste utlendingane kom kom på 6. og 9. plass. Kristoffer Nordvik kom ikkje uventa på topp, Endre Talgø på andreplass og Ola H. Ansnes tok 3.plassen. Først på 6 plass kom den beste tyskeren, der Carsten Bohle representerte ein av de største skiskyttarnasjonane. Beste svenske deltakar, Bjørn Halle Larsnes, kom på 9.-plass.