Arkiv for desember, 2022

Tida er inne for å ringe inn eit nytt år – mellom klokka 17 og 18 sørger kyrkjeklokka for å varsle om det nye året som er på gong.  Etter midnatt kan vi altså skrive 2023, og vi på todalen.no varslar om nytt år for 14. gong. Vi er faktisk litt stolte av at vi har klart å halde den lokale portalen operativ så lenge og at vi heile tida har opplevd eit aukande tendens i lesartala.  Dei siste åra har nok vore ei utfordring i så måte, men i det store og heile har det gått bra.

Det har vore meldinga om ekstremvêr både når det gjeld nedbør og vind dei siste par dagane. Litt vind og litt nedbør har det vore, men langt i frå noko ekstremvêr, heldigvis.  No har det meste av isen på asfalterte vegar tina opp og forsvunne, medan gardsvegar som er grusvegar enno er glatte, men grunn til å åtvare både fotgjengarar og andre trafikkantar. 

Det blir tradisjonell nyttårskonsert på Surnadal kulturhus fredag 6. januar. Denne gongen også med utradisjonell gjestemusikar på bandoneón.

Den tradisjonelle nyttårsgudstenesta i Todalen kyrkje blir på nyttårsaften kl 16:00, melder Todalen sokneråd.   Liturg blir Torbjørn Brøske, medan Bernt Bøe blir organist.  

Da har vi lagt inn REMIDT sin tømmekalender for glass- og metallavfall, restavfall, papp og papir, plastavfall og matavfall, for januar og februar 2023 inn i aktivitetskalenderen vår her på Todalen.no. Tømmekalenderen for mars og april, vil bli lagt inn siste halvdel av februar månad. 

Einy Rendal Elgsæther har sendt oss ein bokomtale av boka «Kyrkja i Stangvik», som du kan lese her. Igjen har Bernt Bøe gitt oss eit lokalt meisterstykke om historie, kyrkje, musikk og kultur. I samband med Stangvik kyrkjes 125-årsjubileum har soknerådet gitt ut ei praktbok som Bernt har vore produsent for. Og dette er ikkje berre 180 sider med interessant lokal kunnskap på mange felt, men god litteratur i skildringane av levd folkeliv og fortsatt levande kyrkjeliv.

Todalen Idrettslag kan melde at det er nypreparerte skiløyper både i lysløypa på Tjønnmyra og nede i bygda, inkludert i Toåa tursti. Det er også trappa trase for å gå på føtene i Toåa tursti.  

Todalen.no traff blink med sin Romjulsquiz 3. juledag i Todalen Ungdomshus. 75 ivrige quizdeltakerar fann vegen til ungdomshuset, som var julepynta for anledningen.

Som vanleg var det god oppslutning om Romjulsmarsjen som tradisjon tru gjekk rundt bygda på 3. juledag.  Folk tykte det var godt å kome seg ut ein tur, og jammen er det da godt å treffe anna folk etter nokre dagar med «bærre» familie.   Sjølv om vêret og føret ikkje var heilt optimalt, så var det bra nok til at folk kledde godt på seg og tok turen rundt bygda til fots – eller med spark.  

Denne nysgjerrige krabaten viste seg fleire gonger i vegkanten attmed Sjøleet i dag.  Odd Arild Sande sørga for å feste den til filmen som han sende til oss på Todalen.no. No er tusenkronersspørsmålet om det er røyskatt eller om det er snømus han har fotografert. 

Tysdag 27. desember (3. dag jul) klokka 19:00 inviterer Todalen.no alle til «Romjulsquiz» i Todalen ungdomshus. Quizmastrane har laga spørsmål innafor mange tema, så her er det noko for ein kvar smak. Todalen.no spanderer forskjelleg typar snacks under romjulsquizen. 

Det som såg ut til å bli ein utsett sesongstart, vart likevel ein sesongstart 2. juledag slik som plana var.   Beltetrøbbel for tråkkemaskina var årsak til at det låg an til utsetting av sesongstarten, fortel Odd Rune Hoem som er dagleg leiar i Surnadal Alpinsenter.  – Vi fikk tak i eit sett med belter i Trysil, og disse var kjapt levert hit, og julaften vart dei montert på tråkkemaskina. Iherdig innsats av gode hjelparar gjorde at vi fikk preparert anlegget ferdig 1. juledag – og i dag opna vi som planlagt for publikum fortel Odd Rune.