Forfattararkiv for

Tysdag inviterte elevane ved Todalen skule familie, vener og bygdefolk til ti-kaffe. Det vart eit riktig kjekt og hyggeleg kaffelag!
Elevane hadde lagt mykje arbeid i arrangementet. Ungane i storskulen hadde først laga fin invitasjon og sendt ut. I mat og helse hadde dei baka sjokoladekake og pynta, og bakels vart steikt like før gjestene kom. Elevane i tredje og fjerde trinn stilte med nybaka kefirkake, og dei dekte bord. Første- og andre-klassingane hadde plukka kvitsymre, og dei stod også for bordpyntinga. Alle kaffebrøda smaka fortreffeleg!

Laurdag ettermiddag 6. juni inviterer Todalen Misjonsforening til 170-årsjubileum. Det skjer i Todalen ungdomshus, og alle som vil delta er velkomne. Misjonskonsulent Janne Bjune og misjonær Åse Neergaard vil delta. På programmet står song, servering og gåve til misjonen og det blir høve til helsingar, og sjølvsagt gratis inngang.

Måndag fekk Todalen barnehage besøk frå NAF Indre Nordmøre. Det var Einar Grønnes som stakk innom med ein ny fin sykkel til barnehageborna, og det vart stor stas, og sjølvsagt vart det kø for å prøvekjøre det nye vidunderet.

Søndag var siste kveld med sjakkspel på Matkroken for denne sesongen. Oppmøtet var da også prega av at det er vår, og mange andre aktivitetar som ligg føre. Men det vart da tre lag som vart med på siste runden og samtidig vart det tid til å diskutere opplegget for neste sesong….

Turistsesongen med døgnope på Todalshytta blir det frå 15. juni, men Eric Malling fortel at det blir ein tjuvstart alt frå månadsskiftet mai/juni med kjendisgjestar på hytta. Elles er både ny grill og ny oppvaskmaskin på plass på Todalshytta.

Denne veka er det sett ut ein ny generasjon med smolt i Toåa. Både 1-årig og 2-årsig smolt vart sett ut, og det skjedde i Brusetmarka i området ved Steinutgarden. Her blir dei sette ut i små merder, slik at dei kan aklimatisere seg før dei sleppes på livet i Toåa og seinare finn vegen ut i havet for å vekse seg store og sterke…

På sildballdagen sist laurdag hadde Todalen idrettslag eit lotteri, der det var eit Hagemøbelsett i rotting som hovudgevist. Loddsal var det også på «jaktkvelden» på tysdag, der lars Olav Lund tok oss med på tur til Antarktis. No har det vore trekning i lotteriet, som i tillegg hadde 9 andre gevinstar. Trekningslista finn du dersom du klikkar deg vidare…..

På årsmøtet til Tine SA i Lillestrøm vart det delt ut sølvtine for samanhengande levering av elitemjølk i 15 år til Olaug Kvendset og Asgeir Longva frå Todalen. Det er ei utmerking som heng høgt, og i Surnadal kommune var det berre 2 bruk som fikk denne utmerkinga. Dei andre som fikk denne utmerkinga var Anne Kari Indergård og Magne Sollid som bor i Bæverfjord.

I serien «storrundt» presenter vi i dag Ørsalbukta – frå Haukåbrua til Halsasvingen – med gamle og nyare bilder på denne strekninga. Det er Todalen historielag som har samla inn bilder og er no komne til Ørsalbukta på runden rundt bygda. Vi reknar med at det er mange som kjenner seg att, både på dei nye og gamle bileta.

Indre Nordmøre Forsvarsforening har sitt museum like ved Bygdemuseet på Åsen. Det er den gamle skulebygninga på Eidet som er teke i bruk som forsvarsmuseum, og som husar mykje gammel krigshistorie – mest frå den 2. verdskrigen. Fredag var det målardugnad, og 4 spreke pensjonistar hadde rigga til stillas og svinga målarkosten for å gi austveggen eit strøk med ny raudmåling.

Frå 2. mai og ut juni er naturfotografen Nils Olav Talgøy aktuell med utstilling på Tingvoll. Nils Olav var på 80-og 90-talet eit kjent trekk i bybildet i Todalen, både med si verksemd som treskjærar og finsnekkar på Nessakaia og som naturfotograf med sitt kamera i Todalsnaturen. Nils Olav er frå Meisingset, sjølv om han har Talgøynamnet og sine aner frå Todalen. I dag bur han med familien på Meisingset, og er no aktuell med fotoutstilling i samband med Kulturvekkå på Tingvoll.

På strekninga frå ferjekaia på Halsanaustan og innover til Felleskjøpets anlegg på Landvegen har det den siste tida vore mykje hjort. Hit kan du dra på hjortesafari og rekne på hundrtals med hjort frå bilvinduet. For ei vekes tid sia var vi på «safari» eit par kveldar for å sjå kva som bydde seg…. Hjorten […]