Vi fann 1024 artiklar i dette arkivet.
Det var fullt rundt salongborda i Sanitetshuset under Fredrikkekaffeen laurdag ettermiddag. Ikkje mindre enn 23 handarbeidsglade kvinner tok pause frå vintersporten i fjernsynet for å møtast til triveleg samvær. Her gjekk praten livleg og strikkepinnane fort!
Todalen sanitetsforening inviterer til Strikkekaffe i Sanitetshuset laurdag 9. februar i tidsrommet 13.00 – 16.00. Her er alle velkomne til sosialt samver med eller utan handarbeid!
Ved Todalen oppvekstsenter er det lang tradisjon for å feire Samefolkets nasjonaldag 6. februar og flagget blir heist til topps. I år vart det ein topp dag både med lassokasting, lunsj og film frå «reinsrace» i Tromsø.
Under årsmøtet i Sanitetsforeninga tysdag 5. februar vart kunstlotteriet for 2018 avslutta, og biletet vart trekt under nøye oppsikt av årsmøteforsamlinga. Det var seld 545 lodd, og den heldige vinnaren vart Per Reiten, og han var ikkje sein om å møte opp for å ta i mot måleriet. Per var gledeleg overraska, han synest biletet var riktig så fint og skulle nok finne ein høveleg plass til kunstverket av Sissel Storslett heime i Ørsalgeilen.
Etter ein lang ferie med julehelg og «mørketid» gjekk første Kløverturen i 2019 av stabelen måndag 4. februar. Det vart riktig så god start på sesongen; fint ver og sola skein på Kvennsetgarden. Ho verma faktisk ganske godt! Men det viktigaste var at 14 trimmarar møtte fram første dagen! «Kjekt å gå tur i lag!» vart det sagt.
Todalen sanitetsforening minner om at dei held årsmøte i Sanitetshuset tysdag 5. februar kl. 18.30
Sola er tilbake etter vinterpausen. No skin ho langt nedover liene og heilt ned på Kvennsetgarden, og ho kryp lenger og lenger oppover bygda dag for dag. Yr lovar godt ver måndag 4. februar så da blir det oppstart for Kløverturane i 2019! Oppmøte ved Halsbua, og så blir turmål bestemt etter ver og føre. Men det blir ein lett tur i nærområdet til butikken. Turstart kl. 11.00.
Todalen idrettslag melder at det no er fine forhold i lysløypa oppå Tjønnmyrå. Det er kome godt med snø, og i løpet av dagen er det kjørt opp spor; så no ligg alt til rette for å ta ein skitur.
Laurdag 19. januar inviterer Todalen sanitetsforening til strikkekaffe. Det er ope hus frå kl. 13.00 til 16.00. Alle er velkomne til sosialt samver med handarbeid, triveleg prat og kaffelag!
Førstkomande søndag, 20.januar kl. 15.00, inviterer Todalen historielag til ettermiddagskaffe i Ungdomshuset. Helge Husby frå Tingvoll har skrive bok om slaget i Gratangsbotnen i 1940 der mange frå gamle Stangvik kommune deltok. Dette er utgangspunktet for kåseriet Helge Husby vil halde i Ungdomshuset.
Vi er i starten av eit nytt år, og nye kalendrar blir hengde opp; i alle fall hos dei som likar å ha kalender på veggen og ikkje berre på mobilen. HAMOS har sett opp tømmekalender for 2019, men han kjem ikkje i posten lenger. Kalenderen er no å finne på heimesida til HAMOS. Men viss nokon ønsker seg ei papirutgåve for å henge opp, er det lagt ut på Halsbua. Og informasjon om søppelhenting ligg også i aktivitetskalenderen til todalen.no.
No er det tid for nytt sanitetsår – det blir medlemsmøte tysdag 8. januar kl. 18.30 i Sanitetshuset. Her er medlemer og andre interesserte velkomne! Alle, både i Todalen og i nabobygdene, er velkomne til å møte opp for å bli kjent med sanitetsforeninga og arbeidet i laget; det er heilt uforpliktande.