Todalen Idrettslag Arkiv

I ein e-post frå Sparebankstiftelsen Surnadal Sparebank i går, vart Todalen Idrettslag informert om at stiftelsen gjev ei gåve til idrettslaget på 20.000 kroner for å kjøpe inn nytt utstyr til oppgraderinga som er under planlegging på Hett & Svett. 

I dag inviterte driftsstyret for Todalen Idrettslag si skihytte til den tradisjonelle «Kjerringdilten» på skihytta. og det kom bra med folk opp til skihytta. 45 av dei frammøtte starta årets utgåve av «Kjerringdilten». Da resultatlista var klar, viste den at Turid Sæther Todalshaug sikra seg eitt napp i vandrepokalen og ein eigen pokal til odel og eige. Det var ikkje så mykje sol å skryte av, men det var fin temperatur og opphaldsvêr, så det var fine forhold for ein skitur. 

Arrangøren trur det var godt og vel 200 deltakarar på Gunnøydilten i år.  Det var Todalen IL Trimgruppa som stod som arrangør, og det var stor suksess både publikummessig og sosialt. Påska samlar forlk frå fjern og nær, og det gjorde jammen Gunnøydilten og.  Det var mykje tilreisane med både utflytta todalingar og folk frå både Kvanne, Surnadal og andre plassar. 

Gunnøydilten har vore stor suksess kvar gong – skjærtorsdag 28. mars er det igjen klart for eit nytt og fint arrangement – Gunnøydilten går etter Toåa tursti, og har sin base rundt gapahuken i Båthølen.  Der er det TILs trimgruppe har tilhald, og som vanleg har dei litt av kvart å by på.  Trimgruppas kanelsnurrar er viden kjent – langt utover Nordmøre.

Fredag 29. mars (langfredag) klokka 13:00 inviterer driftsstyret for skihytta til den tradisjonelle «Kjerringdilten» på skihytta til Todalen Idrettslag. Vinnaren av «Kjerringdilten» får eit napp i vandrepokalen og ein eigen pokal til odel og eige. Veidekke har bidrege økonomisk til innkjøp av heilt nye startnummer, som vil bli brukt for første gong under «Kjerringdilten» langfredag. 

På tysdagar frå 10:00 – 11:30 er det no starta opp dametrim på Hett & Svett. Så har du lyst til å vere med å trimme litt i lag med andre damer og ha det litt sosialt, så er det berre å møte opp og bli med!   

Dei 5 Talgø-pensjonistane har ikkje gløymt gamle kunster.  Onsdag hadde dei «okkupert» PU-avdelinga på Talgø, og var i full gang med å montere bord & benkar som skal brukast rundt omkring i bygda.  Her var det serieproduksjon, med boring og skruing og «vegvesenbenkane» kom ut på løpande band.  Eit tjuetal benkar stod på produksjonsplana, og dei var kappa og lagt på pall ein dag tidlegare, og no hadde dei vore ein tur til Surnadal for å bli royalbehandla.  Dermed får dei vel mesta evig liv  – iallfall blir det nok 25 års råtegaranti, kommenterer snekkarane.  

I kveld var det møte mellom arbeidsutvalet, supplert med bygg- og anleggsleiar i Todalen Idrettslag og styret i Todalen Elveeigarlag, for å drøfte ny leigeavtale for drift av campingplassen ved Bordholmen stadion. Bakgrunnen for møtet var at leigeavtalen som elveeigarlaget har hatt med idrettslaget gjekk ut i oktober i fjor, og at elveeigarlaget hadde teke kontakt med idrettslaget for å få ei eittårig forlenging av denne, slik at det kunne bli campingdrift ved Bordholmen også komande sesong. 

Årsmøtet til Todalen I.L. var unnagjort på halvanna time  – godt førebudde saker gjorde at møteleiar Elinor Bolme fikk sakene fort unna.  Årsmeldingar både frå hovedlaget og gruppene, samt rekneskapen vart godkjent nærast på direkten.   Todalen I.L. har i dag 308 registrerte medlemar, og det er faktisk fleire enn vi har innbyggarar i Todalen. 

Torsdag 7. mars klokka 19:00 er det årsmøte i Todalen Idrettslag i Todalen ungdomshus. No har Todalen Idrettslag lagt ut årsmeldingane sine for 2023 og styret sitt forslag til ny organisasjonsplan. Både årsmeldingane og den nye organisasjonsplana skal behandlast på årsmøtet på torsdag. 

Todalen Idrettslag gjennomfører sitt årsmøte torsdag 7. mars klokka 19:00 i Todalen ungdomshus. No er fullstendig sakliste til årsmøtet klar, og idrettslaget håper medlemmane møter opp på årsmøtet. 

Onsdag 28. februar klokka 18:00 – 19:00 inviterer Barne- og ungdomsgruppa i Todalen Idrettslag til Balleik i gymsalen ved Todalen skule. Her blir det opp til dei som møter opp å avgjere kva for balleikar dei skal halde på med i timen dei har til aktivitetar. Tilbodet gjeld for 1 – 10. årstrinn.