Todalen Idrettslag

Søndag ettermiddag var det tid for TIL-basar i Todalen Ungdomshus.  Økonomien i basaren var nok allereie sikra i førehandssalet, der det kom inn over 22.000 og med loddsalet på basaren og åresalet så var det nok godt over 30.000 og med kioskomsetning i tillegg.  Leiar i Todalen IL er godt nøgd med resultatet, og skryter av givargleda både her i bygda og blant vippskundane utafor bygda som er med og støttar laget.

Søndag 5. november er det klart for årets idrettslagsbasar i Todalen ungdomshus frå klokka 15:00 og utover ettermiddagen til rundt klokka 18:00. Førehandssal av lodd på felleslista via Vipps 527926. Kvart lodd kostar kroner 50,-, og hugs å skrive namn på den lodda skal stå på når du vippsar, og siste frist er laurdag 4. november klokka 24:00. Folk frå idrettslaget vil også vere på Matkroken Todalen fredag 3. november frå klokka 10:00, for å selje førehandslodd. 

I dag starta tre karar frå Todalen historielag arbeidet med å pusse opp loftet i ungdomshuset, slik at Halse-samlinga som i dag er lokalisert i skulen, kan flyttast til ungdomshuset. Dette fordi skulen no er lagt ut for sal, og at Halse-salinga da blir «huslaus». Halse-samlinga har tidlegare vore lokalisert på Haugabu, på Todalshytta, i gammelskulen og i skulen, men blir altså no flytta til ungdomshuset. 

Neste søndag, 5. november frå klokka 15:00, inviterer Todalen Idrettslag til Idrettslagsbasar i Todalen ungdomshus. I dag tek førehandssalet av lodd til basaren til via Vipps. Måndag 30. oktober klokka 10:00 – 14:00 og fredag 3. november klokka 10:00 – 15:00, vil i tillegg folk frå idrettslaget selge lodd på Matkroken Todalen. 

I går kveld hadde Todalen Idrettslag invitert ungdommane til medlemsmøte for å diskutere drifta av det nye aktivitetsrommet i reiskapshuset på Bordholmen stadion. Og på møtet kom ungdomane med ønske om driftsform og framtidige aktivitetar dei ønsker i det nye aktivitetsrommet. 

Todalen Idrettslag har mange aktivitetar og arrangement utover hausten og førjulsvinteren, så her er det mykje å vere med på. Først ut er oppstarten på eit nytt trimår i morgon, og på måndag er det medlemsmøte for ungdommane i reiskapshuset på Bordholmen klokka 18:00, sidan går det slag i slag utover hausten og førjulsvinteren!

Denne veka kom gladmeldinga om at SpareBank 1 SMN, gjennom sitt samfunnsutbytte, løyver kroner 25.000,- til Todalen Idrettslag sitt aktivitetsrom i reiskapshuset på Bordholmen stadion. 

Laurdag 30. september er siste dag i årets trimsesong i appen Trimpoengappen – «På tur i Todalen 22-23, og søndag 1. oktober tek den nye «På tur i Todalen 23/24» altså til. Todalen Idrettslag fortsett altså med den populære trimappen også i den komande trimsesongen.

Styret i Todalen Idrettslag kallar inn ungdommane til medlemsmøte måndag 2. oktober klokka 18:00 i aktivitetsrommet i reiskapshuset på Bordholmen. Her ønsker styret å få høyre ungdommane si meining om korleis det nye aktivitetsrommet på Bordholmen skal driftast. 

Todalen Idrettslag melder at setet på multitreningsapparatet på Hett & Svett er ødelagt. Det vil bli prøva å få sveisa setet, men om ikkje dette går, så må nye deler kjøpast, og det kan ta litt tid. Meir informasjon kjem etter kvart. 

I går ettermiddag hadde barne- og ungdomsgruppa i Todalen invitert til lagseriestemne på Bordholmen. Oppmøtet var ikkje det heilt store, men dei som var der fekk ein fin kveld. For etter at sjølve lagseriestemnet var ferdig, kom Sigve og Per Holten på besøk, for å lære bort litt om kulestøyt og diskoskast, to øvingar, få eller ingen av dei frammøtte hadde prøvd før!

Søndag 17. september klokka 17:00 inviterer Barne- og ungdomsgruppa i Todalen Idrettslag til lagseriestemne på Bordholmen stadion. Klokka 18:00 kjem surndalingen Sigve Holten frå, for å lære bort kulestøyt.