Todalen Idrettslag

Dei lokale snøprodusentane Bergli og Ranes melder om fine forhold i akebakken på skulen no i kveld. Dei har i tråd med vêrmeldingane og muligens ved å følgje med på konkurrentane ved større anlegg, sett snøkanonen i full produksjon ved akebakken i Todalen Oppvekstsenter.

Gubbetrimmen er klar for 2016-sesongen alt førstkomande måndag (4.1.), med oppmøte i gymsalen i skulen kl 20.00. Gamle og nye trimmarar er velkomne til å bli med oss inn i ein ny trimsesong – som alt er på plass i aktivitetkalenderen!

I dag var det full fres i Todalen ungdomshus under Idrettslagets juletrefestarrangement. Juletrefest i romjula har dei siste åra vore fråværande i Todalen, men etter oppmøtet å sjå til, kan dette vera eit arrangement som kanskje kan vidareførast i framtida. Mange småbarnsfamiliar var samla til gang rundt juletreet og ikkje minst ein god prat over ein enkel kopp kaffe.

Publikum sette stor pris på julerevyen ”Rikets tilstand” i Todalen ungdomshus 3. juledag. Ei god blanding av rekruttar og veteranar på scena, og eit ungdommeleg publikum vart ein fin miks som ga ”stinn brakke” gjennom halvannan time med artig underhaldning frå scena.

Også i år fekk trimgruppa i Todalen IL fullklaff med sin årlege romjulsmarsj. Med ein gradestokk som viste i underkant av 10 minus og topp sparkføre var det nesten 180 personar som tok den tradisjonelle turen rundt bygda. I Sandstadkrysset og på Bruset var det som vanleg drikkestasjonar der deltakarane fekk kakao eller gløgg i koppane. Her var det også quiz, med allsidige spørsmål som det var bortimot umuleg å svare på.

Todalen I.L. går ei travel jul med mange aktivitetar i møte. Dei startar alt 3. juledag kl 12, med romjulsmarsjen som første post. her er det start mellom 12 og 15, deretter blir det julerevy med to forestillinga kl 15 og 20 – og 6. juledag (30. desember) blir det juletrefest i ungdomshuset mellom kl 14 og 16.

No er billettane til Todalen IL’s tradisjonsrike romjulsrevy lagt ut for sal på Matkroken. Årets julerevy går av stabelen 3. juledag – 27. desember – og er i år kalla for «Rikets tilstand» og ber sitt namn med rette, fortel revygjengen som vi trefte i ungdomshuset tysdag kveld og som no er i full gang med øvingane.

Søndag ettermiddag var det tid for å ta ein pause i julestrida og treffast til sosialt lag i Todalen ungdomshus. Ragnhild Ansnes Moe kunne ønske nærare hundre sambygdingar velkomen til denne adventkafeen og spesielt velkomen til dei er nye innflyttarar. Dei eldste i barnehagen og skuleungane markerte starten på arrangementet med Luciatog og flott song på Luciadagen.

Søndag ønsker Todalen Sanitetsforning, Todalen Historielag, Todalen IL, FAU, PT-utvalget, Skustuas venner og Start 4H til velkomne til adventskaffe i ungdomshuset. Der blir det muligheit for eit pust i førjulsbakken og ikkje minst til å treffe naboar og bygdefolket over ein enkel kopp kaffe.

Også i år ønsker ulike lag og organisasjonar velkomne til adventskaffe i ungdomshuset der det blir muligheit for eit pust i førjulsbakken og ikkje minst til å treffe naboar og bygdefolket over ein enkel kopp kaffe.

Arrangementet er lagt til luciadagen den 13. desember, og i den anledning blir det naturlegvis eit luciatog av dei eldste i barnehagen og alle skuleungane.

6. juledag blir det juletrefest i Ungdomshuset. Da er juletreet på plass, og det blir både julesongar og gang rundt juletreet både for store og små, melder Knut Bergli i Todalen idrettslag. Han fortel vidare at det blir servering av saft, kaffe og julekaker – og kanskje kjem også nissen og har med seg nokre gåveposer […]

Nils Ove Bruset vart laurdag kveld heidra av sambygdingane, da han i samband med den tradisjonelle hjortfesta vart tildelt heidersprisen ”Den Gyldne Patron”.Nils Ove var heilt uvitande og totalt overraska da han vart kalla opp på scena for å ta i mot ”den Gyldne Patron”. Heidersprisen blir delt ut på hjortfesta kvart år, og går til ein eller flere personar som har utmerka seg gjennom positivt arbeid for bygdesamfunnet på ein eller anna måte, sa Lars Stensby som var festleiar og delte ut prisen.