Riktig kjekt med Fredrikkekaffe!

Sjølv med spennande VM-dagar i Seefeld og mange norske medaljar var det stort oppmøte på Fredrikkekaffeen laurdag ettermiddag. Rett nok skal det seiast at somme kom etter at Therese og Ingvild hadde gått i mål på 3-mila. Bra at folk kan vera engasjerte i mange og ulike saker!

Dordi Fedje som kan det meste om handarbeid og er flink til å forklare, var på plass i Sanitetshuset. For dei som hadde lyst til å lære ein ny teknikk demonstrerte ho «dominostrikk» – ein artig strikkemåte med fine effektar. Denne teknikken, ein lappeteknikk, kan brukast til å lage fine teppe, sjal, gryteklutar, oppvask-klutar osb. Ja, på nettet kan ein finn oppskrifter både til genser og tøflar, og blir ein riktig ivrig, er det fleire bøker om emnet.

Men det var skikkeleg artig å prøve seg på dominostrikk, lettvint måte å lage fine lappar og få strikka dei saman. I tillegg til å vise dominostrikk hjelpte Dordi til med å gi gode råd og tips om strikking på basisplan – kjekt for underteikna i alle fall!

Sjølvsagt var det fritt fram for å strikke vidare på både genserar, teppe og lestar eller brodere på bunadsselar som det hasta med å få ferdige, stor innsats og livleg prat!

Helen og Arndis serverte kjempegode kaffebrød og kaffe, og det var basarstemning med utlodding og mange gevinstar.

Heile 25 deltakarar på strikkekaffeen – riktig kjekt og triveleg arrangement!