Musikk kan vere helsebringande og med det føre til betre livskvalitet innafor t.d. eldreomsorga. Tysdag kjem Audun Myskja til Surnadal for å fortelje korleis ein skal bruke musikk på ein slik positiv måte.
Audun Myskja vil tysdag 29. november, på dagtid, vere forelesar for tilsette i helse- og omsorgssektoren frå fleire kommunar. Men på kvelden, frå kl. 18, kan kven som helst kome for å høre på Myskja i kulturhuset på Skei.
Myskja vil m.a. formidle korleis ein kan bruke musikk der ein elles ikkje når fram. Riktig bruk av musikk kan hjelpe til å forstå kva behov pasientar, t.d. særleg langtkomande demente, har. Og lærer ein seg dette, vil ein gi pasientane ein betre kvardag – med auka livsglede, meir ro og velvære.
Myskja har ikkje berre brukt musikk i omsorga av dei som kanskje treng den aller mest. Han har gjeve ut 12 CD-ar og 1 DVD som absolutt alle kan dra nytte av for å lære seg avspenningsteknikkar og meistring av eige liv.
Audun Myskja er overlege og forskar og har gjeve ut mange fagbøker. Du kan lese meir om Myskja på nettsida livshjelp.no .
Surnadal kommune er med på eit pilotprosjekt som heiter «Krafttak for sang» (krafttakforsang.no), og det er dette prosjektet og Surnadal demens- og helselag som inviterer til foredraget tysdag 29. november.