Vi har alt fått mange lam – travelt åt Nils Erik!

I Oppistua på Hjellnes er det ein stor flokk med utangarsau som no er klare for lamming – 4-5 sauer har alt lamma, og til no er det kome 7-8 nye og svarte lam.  Nils Erik som går siste året i barnehagen i Todalen, har mesta ikkje tid til å være i barnehagen no. Og det skjønar vi godt, for no skjer det mykje spanande i fjøset og nye lam kjem til verda kvar einaste dag.

Men Nils Erik må være litt forsiktig, for sauene har lett for å bli skremt – og det er ikkje bra no når dei ordnar seg på lamming. – Han må også være litt forsiktig når han er oppe i lag med sauene, for dei sauene som har lam har eit sterkt morsinstinkt og passer god på lamma. Dermed kan ein bli stanga, fortel faren Per Åke Jacobsson som er med oss i fjøset.

Han fortel vidare at utgangarsauene går ut og inn av fjøset som dei vil heile året, og er ikkje redd om det blir litt snø og kuldegrader. Maten sin får dei i eit stativ utafor fjøset, og difor må dei ut for å finne seg mat. Men når lamminga nærmar seg så trekkjer dei inn i fjøset for å finne litt meir ro og trygghet.  Per Åke fortel at dei stort sett klarer seg sjølv under lamminga, men han liker å følge med litt i tilfelle det skulle bli problem eller dei føder ute og blir våte og kalde.

Etter kvart skal det nok bli mange lam og litt av eit styr i Oppistufjøset, så vi skjønnar godt at Nils Erik ikkje tykkjer det er så viktig å prioritere barnehagen akkurat no i april.