Laurdag ettermiddag kunne Todalen sanitetsforening endeleg invitere til strikkekaffe i Sanitetshuset. På grunn av koronarestriksjonar har det vore eit langt opphald for strikkekaffien; forrige samling var 7. mars 2020, altså ein pause på nesten 1 ½ år.
Sjølv om sola skein, var det godt oppmøte! Mange sette pris på å kunne møtast til hyggeleg og uformell prat, og det var så reint god og triveleg stemning rundt borda.
Tru kven som får nye lestar til jul? Ingeborg og Grete er flittige. Foto: Dordi J H
Arndis Søyset og Helen Saksen var vertinner og stilte med gode kaffebrød; eplekake og kanelsnurrar.
Neste strikkekaffe/Fredrikkekaffe er om tre veker, altså 25. september. Helen og Arndis, som er ansvarlege for Fredrikkekaffeen, fortel at plana er å ha strikkekaffe kvar 3. veke framover hausten.
Her blir det lestar og kopptuer i glade og friske fargar! Foto: Dordi J H
Flittige hender, damene kan kunsten å «multitaske»; – det er ikkje problem å både strikke, prate og drikke kaffe samstundes! Foto: Dordi J H