Todalingar på «glattisen» i Trondheim

Sjølv om det foregår eit verdsmeisterskap på ski i Trondheim, så foregår det også anna sport i Trønderhovudstaden, som til dømes i Leangen ishall, der Ozo Melhus laurdag hadde invitert Surnadal Blades til kveldskamp i ishockey i ishallen. Knut Bergli har sendt oss ein liten rapport frå kampen i Leangen ishall laurdag kveld. 

Kampen gjekk over tre perioder av 25 minutt, og det var topp oldboys-ishockey som stod på sendeplana.

Kampen vart spela etter oldbys-regler, der det ikkje er lov med taklinger og slagskott. To særs gode 14-åringar dømte kampen og passa på at alle ufine triks vart lønna med utvisningar.

Surnadal sitt lag var laurdag kveld forsterka med eit par rindalingar som bidro sterkt i målstatistikken, og Jakob på 13 år er nok den yngste som har spela på eit oldboyslag. Så det var eit slags midt-norsk «All-Stars» som representerte Surnadal Blades denne laurdagen, fortel Knut Bergli. 

Kosleis endte så kampen? Laga følgde kvarandre fra første dropp. Ozo tok leiinga etter berre eit halvt minutt. Surnadalingane, var kanskje litt preget av «jet-lag», brukte nokre minutt på å få i gang maskineriet, men etter «sjokkstarten» følgde laga kvarandre tett, og med fem minutt att av kampen var stillinga 7-7.

Da sette Surnadal i gang sluttspurten. Anført av halvt brasilianske og halvt todalske Halvard Pereira Nordvik, som framleis hadde krefter att i beina og hovudet, scora kampens to siste mål! To flotte soloraid, og kampen endte med seier 9-7 til Surnadal Blades Etter kampen var det felles lagbilde og deling av Ozo si nydelege heimeebaka kake. Topp stemning!, skriv Knut til slutt i rapporten sin!