Dei siste dagane har familien Shade frå Michigan vore på gamle tomter i Todalen. Med Todalshytta som base og Ragnar Halle som kjentmann og omvisar har dei vore rundt og gjort seg kjent i Todalen. Mellom anna har dei vore innom Talgøtrøa, som er staden som Talgøyfamilien tok avskjed med da dei flytta til Eide. Bestefaren til Gregory, var fødd i 1877 i TalgøTrøa, og reiste vidare frå Eide til Michiganområdet i 1903 – da var han 26 år gamal.
Gregory Shade besøker Talgøtrøa – no er det berre novsteinen att av huset der dei budde. Foto Ragnar Halle
Mora til Gregory, Mildrid, var født Talgøy og ho danna familie med faren Gerald Shade – slik kom altså familienamnet Shade inn. Gregory er no her saman med kona Linda og borna Daniel, Benjamin og Nicholas – alle med etternamn Shade. På Todalshytta trefte dei og slekningar frå Meisingset Nils Olav Talgøy og Ola Talgøy. Her vart det sjølvsagt diskusjon om slektskap og korleis dei var i slekt. Da var den nye bygdeboka for god å ha for å finne dokumentasjon på korleis slektskapet heng i hop.
På Todalshytta trefte Gregory Shade slekt frå Talgøtrøa – Nils Olav Talgøy og Ola Talgøy – Ragnar Halle har vore guide og omvisar under opphaldet i Todalen. Foto Jon Olav Ørsal
Til Todalen kom dei via Voss der sonen har gått på folkehøgskule det siste året. Elles fekk dei oppleve grunnlovsdagen 17. mai i hovudstaden. Sia har reisa gått litt rundt omkring og no er dei altså hamna tilbake til røtene i Todalen. Derifra går turen vidare til Gran i Hadeland, der Gregory var utvekslingsstudent i sin ungdom. Sidan går turen vidare til USA og heim til Michigan.
Eit lite bildegalleri frå Amerikabesøket i Talgøtrøa i dag
