Fredag fekk ungane ved Todalen oppvekstsenter overrekt ei gåve som skapte interesse, glede og engasjement; heile 56 nye bøker, 31 til barnehagen og 25 til skulen! Givaren var Sanitetsforeninga i Todalen.
Bakgrunnen for gåva er at Lesevenn er ein av basisaktivitetane til NKS, og i godt og vel eit år har tre sanitetskvinner i bygda vore lesevenner ved oppvekstsenteret. I samband med dette kunne Sanitetsforeninga gjennom NKS sentralt søke om støtte til prosjektet frå Egmont Fonden. Søknaden vart imøtekomen, og ein del av pengane er brukte til å kjøpe inn bøker til ungane.
Bøkene vart tekne i bruk tvert. Fremst ser vi mellom anna lesevenndamene May-Elisabeth Holten, Maren Ansnes og Dordi Jorunn Halle i lag med rektor Britt Mossing. Bak kamera Marit.
Det er fredag som er lesevenndag, på skulen er det da også boklån, og elevane er ivrige til å låne bøker. Da vi starta opp med lesevenn etter jul i år, kom rektor ved skulen med ønske om at vi skulle ta utgangspunkt i lokal kultur og historie. Så for elevane i trinn 3 til 7 har presentasjon av Leif Halse stått på programmet. I 3. og 4. klasse har vi lese frå «Flagg over Vangen», og for trinn 5 – 7 er det henta lokalhistorisk stoff frå Bygdeboka «Todalen» mellom anna om bjørnejakt i Todalen på 1700- og 1800-talet. Dette har vore populært, og det er også formidling av lokal kulturarv. For elevane i 1. og 2. klasse har vi lese tradisjonelle barnebøker, rim og regler. Vi les sjølvsagt mest mogleg på nynorsk.
Mykje spennande å finne i gode bøker. Foto: Dordi J H
Rektor ved skulen, Britt Mossing, var svært glad for bøkene. Det er lite pengar på budsjettet til å kjøpe inn bøker til biblioteket. Og så interesserte som elevane er i å lese bøker, er det kjekt å ha noko nytt, spennande og aktuelt å by dei – det er med å auke lesegleda!
Kjempekjekt med nye bøker! Maren og May-Elisabeth viser fram dei nye bøkene. Foto: Dordi J H
Styraren i barnehagen, Jorunn Nordvik, var ikkje mindre glad for nye bøker, ho har ikkje midlar til bokkjøp på budsjettet i år. I barnehagen blir bøkene etter kvart litt utslitt og frynsete i kantane så dei treng utskifting. Bøker er viktig i det pedagogiske arbeidet i banehagen både til språkstimulering, begrepsinnlæring og til å utvikle sosiale ferdigheiter.
I barnehagen ønskte dei seg sterkt serien «Ti små vennebøker». Bøkene som handlar om vennskap. Kvar bok har eit emne: Seie unnskyld, Dele, Vente på tur, Seie stopp, Roe seg ned, Bli einige, Snakke om det, Samarbeide, Spreie glede og Vise kjensler. Barnehagen hadde frå før plakatane i serien til samtalar, men hadde ikkje hatt råd til å kjøpe bøkene. Dette blir kjekt å bruke i samlingsstundene framover.
Klar for å ta fatt på «Ti små vennebøker». Foto: Dordi J H
May-Elisabeth Holten har kjøpt inn bøkene i samråd med Britt og Jorunn, og bøkene er kjøpte på bokhandelen i Surnadal – det var Mammutsalg så det vart til dels nokre godkjøp. Både skulen og barnehagen er glade for å kunne samarbeide med Sanitetsforeninga, lokalt engasjement er ein styrke for oppvekstsenteret.
Språkstimulering og lesing er satsingsområde i barnehage og skule, og vi håpar dei nye bøkene vil gi mykje glede for små og store framover!
Populært med nye bøker. Dei vaksne er frå venstre Jorunn Nordvik, May-Elisabeth Holten og Maren Ansnes. Foto. Dordi J H
Godt å ha ei bok i handa! Foto: Dordi J H
May tok seg tid til å lese til lydhøre gutar. Foto: Dordi J H