Denne gongen er det Randi Sogge (fødd Halset frå Furuhaugen) sin handarbeidspose vi skal presentere. Randi laga handarbeidsposen sin i 4.årstrinn (første året i storskulen) i 1953. Læraren i handarbeid ved Todalen skule på den tida var Aslaug Ramsli. Randi kan og fortelje at ho seinare hadde Brit Ørsal (fødd Ansnes) i handarbeid, og då føregjekk undervisninga heime hjå Brit i Utigarden på Ørsal.
Handarbeidspose tilhøyrande Randi Sogge. Foto: RS
Randi vart seinare sjølv utdanna til lærar og ho starta si lærargjerning ved Todalen skule skuleåret 1965/66. Det var ho som var handarbeidslærar då Ingri Bruset laga sin handarbeidspose i 1965, som vi skreiv om sist veke.
Randi arbeidde som lærar i heile sitt yrkesaktive liv. Ho starta som tidlegare nemnt som lærar ved Todalen skule i 1965. Frå 1966, etter at ho gifta seg med Vidar Sogge og flytta til Melhus i Lykkjebygda, vart ho tilsett som lærar ved Stangvik skule Evenshaugen, men ho hadde skuleåret 1966/67 delt arbeidsstad mellom Stangvik og Todalen skular. Randi vart verande ved Stangvik skule som lærar heilt fram til ho gjekk av med pensjon i 2004.
Fotomontasje – kaffekos på lærarrommet 1966. Foto og montasje: RS