Skredkurs og utfart på Kårvatn

Sjølv om det nok var litt kald vind og snøfokk i høgda var det mange som nytta den flotte dagen til å ta seg ein skitur.  Det var mange bilar både på Kårvatn og på parkeringsplassen ved Innerdalsmerket. Med tanke på vind og snøfokk, så er det nok dørstokkmila som er verst, for i dag finnes det stort utval i gode klær for den som vil ut.  Sjølv med vind og snøfokk i lufta var nok Dalalia og Tydalsnebba målet for mange som ville prøve pudderføret etter det siste snøfallet.

Ei gruppe frå Trondhjems Turistforening er i gang med nok eit skredkurs i Dalalia. Dei har tilhald i Målastua på Kårvatn, og har nok yppeprlege forhold for å arrangere skredkurs i Dalalia og området nedafor Tydalsnebba.  Håvard Engen frå TT er kursleiar, og kurset starta fredag kveld. Kurset skal fortsette både laurdag og søndag.  Her får deltakarane lære seg å vurdere vêr og føreforhold, samt å lære seg å vurdere kva som er farleg og korleis ein skal ferdast trygt i fjellet, for det er ikkje nok å lite på yr.no som er eit mekanisk generert varsel.  

På «butikken på låven» var det også aktivitet. Laurdag var det Nils-Erik Ulset som hadde helgevakt, og da vi stakk innom var det Therese Jørgensen og Sindre Søderlund som fikk gode råd i valg av randoneeutstyr. Kårvatn Fjellutsyr var tidleg ute med satsing på randoneeutstyr og kan vel kalle seg pionerar på det området.  Sjølv om Nils-Erik er skiskyttar hørtes det ut som han hadde god peiling på val av utstyr til lydhøre kundar. 

Frå Mari Redalen har vi fått nokre «pudderbilder» fra området mellom Dalalia og Tydalsnebba – kald vind, men elles fint rapporterer Mari!