Samhald og trivsel på Norway-Cup

Sist laurdag reiste mange lokale fotballspelarar til Norway-Cup i Oslo. Kampane tok til søndag formiddag, og dei siste finalane blir spela i morgon. Totalt var det 20 spelarar frå Søya/Todalen som sette kursen til Oslo og Norway-Cup. Dei fleste av spelarane frå Søya/Todalen spelar no for Surnadal, men 4 spelarar spelar for Surnadal/Søya G 13 og 3 spelar for Kvass/Ulvungen-Søya/Todalen G 14. 3 av dei 20 spelarane frå Søya/Todalen er frå Todalen. Alle dei lokale laga er no ferdigspela og spelarane stort sett komne heim. 

– Norway-Cup har vore ei positiv oppleving, både sosialt og sportsleg, seier leiar i I.L. Søya si fotballgruppe, Leif Magne Andersen. – Dette er ein opplevelse for alle, og noko dei hugsar resten av livet, legg han til. 

Fleire av dei lokale laga har gjort det bra sportsleg. Aller lengst av dei lokale laga kom i år Surnadal/Søya G 13, som nådde 1/16 dels-finalen, der det vart tap 1 – 5. 

Like viktig som det sportslege under Norway-Cup, er det sosiale og det å bli kjent med andre spelarar frå andre lag. Med ein kamp kvar dag dei første dagane, blir det god tid til å gjere andre ting. Så dei fleste har nok fått eit minne for livet, og neste år reiser nok mange nedover til Oslo for å delta på neste års Norway-Cup. 

For resultat og meir om laga sine kampar, viser vi til driva.no som har hatt ei fyldig dekning frå årets Norway-Cup. Her kan ein også sjå nokre kampar med lokale lag i opptak.