Tysdag kveld klokka 19:00 blir ei fulltonande og lærerik stund i Stangvik kyrkje. Publikum, konfirmantar, kor og kyrkjestab opnar da salmeboka i full breidde. Dette heiter det i ei pressemelding vi har fått i dag
«Norsk Salmebok 2013» er truleg landets rikaste samling av poesi og musikk. Dette har inspirert prest og konfirmantlærar Torbjørn Brøske til å dykke djupt i skattkista.
– For konfirmantane i Todalen, Åsskard og Stangvik blir dette ein annleis undervisningstime, seier Torbjørn. – Samtidig blir det ein open songkveld for publikum, og vi håpar mange møter opp og stemmer i, legg han til.
Torbjørn Brøske har utvida konfirmanttimen tysdag til salmekveld for heile prestegjeldet. Foto: Bernt G. Bøe
Salmeboka har innhald med skikkeleg sus: Sterke tekster som handlar om alle livets faser og følelsar, frå heilagt alvor til jublande fryd. Musikk som biletleg tala kling i alle toneartar, frå danserytm1r til melankoli.
Torbjørn har fått med seg damekoret Credo, leia av kantor i Surnadal, Oddveig Helset Halle. Tidlegare korleiar frå Høgskulen i Levanger, Svein Volle, syng kjende «bedehussongar». Både Oddveig Halle og kollega Bernt Bøe gir tonefølge.
Torbjørn knyter programmet saman – i rask «sju-mils-vandring» gjennom historisk salmekultur. Emne som «Luther», «Fjerne himmelstrøk», «Folketonar» og «Forvaltaransvaret» fortel om variasjon og heilskap i salmevalet.
Men tru kva diktaren bak «Herre Gud, ditt dyre namn og ære» hadde med Stangvika å gjera?
Bernt Bøe lovar å røpe diktarpresten Petter Dass si spesielle tilknyting til nettopp Stangvika. – Men kva den bestod i, er det dei frammøtte som får vite, seier han.