Populært med ishockey i Surnadal

I haust har den nystarta ishockeyklubben Surnadal Blades investert mykje i ishockeyvant og anna utstyr, for å kunne lage ishockeybane på Øye stadion. Øye stadion ligg rett ovanfor den nye barne- og ungdomsskulen på Øye, og plana er at elevane ved skulen kan nytte ishockeybanen på dagtid, i friminutta og gymtimane, medan klubben sjølv disponerer tida på kveldstid. 

Tilbodet om ishockey har blitt ein suksess, og banen har vore godt besøkt etter at den vart opna. Det er lagt opp til organisert trening for både unge og vaksne på kveldstid i regi av Surnadal Blades. I går kveld var det sytten ungar/ungdommar som møtte opp for å trene ishockey, inkludert tre ivrige spelarar frå Todalen.