Mange har kanskje teke påskeferie allereie og gjort seg klar for årets påskeutfart. Men ingen påske utan påskekrim vil nokon påstå. Både på tv og i bokform. Som tidlegare nemnt kan vi i år óg skilte med vår eigen påskekrim her på todalen.no, etter fjorårets suksess «Kronhjort i måneskinn». Også i år er forfattar Guro Redalen, og ho har dei siste vekene fått på plass dei siste brikkane i eit nytt komplott som vi lesarane blir inviterte til å løysa etter kvart som helligdagane skrid fram.
Her er eit lite utdrag av årets påskekrim del 1, Svanefjorden – eller pøblar med polsfot: Sanninga var at Bladfyk gjerne kunne teke på seg oppdraget igjen. Det hadde ikkje vore så mykje oppstuss og åtgaum for ho i etterkant av at tjuven av Kronhjort i måneskinn vart avslørt. Årets bilete-vinnar 2011, 2012 og 2014 hadde derimot slått seg opp med eigen blogg og nettkurset ”Dagens bilete – korleis bli ein vinnar”
Oppstart blir onsdag 23. mars med påfølgande 4 episodar kvar morgon, og løysinga til slutt 2. påskedag. Søndag blir det muligheiter for å sende inn svar, og vinne heder og ære, og kanskje noko å tørke fingrane på.