Operapub med trampeklapp i Todalen ungdomshus

Eit fullsett Todalen ungdomshus tok godt i mot Operapuben frå Stangvikfestivalen torsdag kveld.  Ein kan vel seie at Stangvikfestivalen tjuvstarta årets arrangement i Bøfjorden i går kveld, og at det nærast var ein form for tjuvstart også i Todalen torsdag kveld.  Festivalens første arrangement i Stangvika er PUB med noko 6263 attåt, seinare torsdag kveld.  Kveldens pub i ungdomshuset opna dørene kl 18, og Todalen Idrettslag sørga for servering før konserten starta kl 19. 

Sigrid Vetlesæter Bøe er programansvarleg for Stangvikfestivalen, og ho hadde klart å skaffe nokre av dei beste operasongarane til årets festival, og dei fekk vi ein imponerande forsmak på under kveldens førstilling i Todalen ungdomshus.  Her stilte operasongarar frå både Stockholm og Berlin, og da måtte det berre bli bra. Vi fekk høyre sopran Anna Malesza-Kutny, tenor Linard Vrielink, baryton Jaka Mihelac, baryton Adam Kutny og bass Erik Rosenius i tillegg til Sigrid Vetleseter Bøe.  Hedda Hansen Berg sørga for å akkompagnere på piano, og det var ei oppgåve ho kom godt ut av. 

Gjennom førestillinga som gikk i tre avdelinger fekk vi høyre variert operasong, og publikum var med og ga skikkeleg tilbakemelding til songarane i form av applaus og trampeklapp. Ei fantastisk førestilling som ein trygt kan seie at det er sjeldan men opplever – snakk om full utteljing på billetten. 

Etter at førsestillinga var ferdig vart det både eitt og to ekstranummer – heilt til slutt song tenor Linard Vrielink, baryton Jaka Mihelac, baryton Adam Kutny og bass Erik Rosenius «Der fjordene blåner», flerstemt og med norsk tekst.