Merkurprogrammet og handelsdepartementet er initiativtakarar til årets store handledag. Det dreier seg enkelt sagt om å informere om kor viktig nærbutikken er for å skape levande bygder. Merkurprogrammet sørger for behovsprøving av driftsstøtte og investeringsstøtte for nærbutikkar som ligg meir enn 25 km frå næraste konkurrent og som har ein viktig funksjon for å gjera bygdene livskraftige. Laurdag 20. oktober blir det eit skikkeleg kaffeslabberas på Matkroken Todalen, med servering av gratis kaffe og blautkake frå kl 10 og utover så langt det rekk….!
![](http://todalen.no/wp-content/uploads/2018/10/PerRJonH_2018_5493-1200x800.jpg)
Per Reiten og Jon Bjarne Husby «heldt fortet» på kaffekroken i dag da vi var innom ein tur. Foto: Jon Olav Ørsal
Nærbutikken er ein viktig samlingsplass i mange bygder, og avgjerande for levande lokalsamfunn, seier kommunal- og moderniseringsminister Monica Mæland til Merkur-programmet. – Derfor satsar regjeringa vidare på Merkur-programmet og løyver nær 50 millionar kroner i statsbudsjettet for 2019. Det er også viktig at kommunale institusjonar handlar lokalt, for det er akkurat same lova som gjeld der – blir ikkje butikken bruka så blir han borte.
![](http://todalen.no/wp-content/uploads/2018/10/Oppskrift_5499-1200x841.jpg)
Oppskrifta er enkel og den kan brukast både i Todalen og andre plassar. Og vi har da vel ingrediensane? Illustrasjon fra Merkur-programmet
Handelsmann Nordvik håpar at ekstra mange tek turen innom butikken og tek handelen der – og han lovar ei skikkeleg prisbombe på Matkroken Todalen på laurdag. Foreløpig held han korta tett til brøstet og da får vi vel leva i spenning til laurdag.
![](http://todalen.no/wp-content/uploads/2018/10/Matkroken_2018_5489-1200x836.jpg)
Matkroken Todalen – Laurdag blir det lokal handledag og servering av kaffe og blautkake. Foto: Jon Olav Ørsal