Lyspålane i lysløypa på Ørsal tekne ned og demontert

I løpet av helga har det pågått demonteringsarbeid av lyspålane i Todalen Idrettslag si gamle og nedlagte lysløype på Ørsal i Ørsalbukta. Det var Bjørn Kvendset, med gravemaskin med klip, som tok ned alle pålane. Ola H. Ansnes demonterte alle lysarmaturane og kablane imellom, slik at armaturen og kablane, no i kveld, kunne samlast inn for levering på godkjent søppeldeponi. 

 

I kveld var folk frå Todalen Idrettslag kalla inn for å samle saman dei demonterte armaturane og kveile saman kablane. Alt saman vart lasta opp på hengar og frakta ned til garasjen på Ørsal, for vidare transport og levering derifrå. 

 

Leiar i Todalen Idrettslag og for dugnaden, Elinor Bolme, var godt nøgd med at det møtte ti personar for å hjelpe til med dugnadsarbeidet, spesielt med tanke på det korte varslet, på berre nokre timar! Ho nyttar også høvet til å takke Bjørn Kvendset og Ola H. Ansnes for godt utført arbeid med å få demontert den gamle lysløypa. 

 

Idrettslaget si gamle lysløype på Ørsal, som vart teken i bruk siste halvdel av sekstitalet, har stått ubrukt i mange år no, etter at den nye lysløypa på Tjønnmyra vart ferdigbygd og teken i bruk i 2013. Så da er det berre sjølve traseen som vitnar om at det ein gong har vore ei lysløype her.