Kløverturar i sol – Kvennset og Haltbakkan

Kløverturen på FN-dagen, altså 24. oktober, gjekk frå Sjøledet og utover til Haltbakkan. Sola var lenge gøymt bak eit skoddehav, men etter kvart «brann skodda opp» og kløverturgjengen fekk nyte sola. 

Sola vermde godt ved Haltbakkhavet, og det vart ein lang og triveleg kaffepause nede ved fjøra.

I Bygdeboka for Surnadal, band 3 kan ein lese: «Haltbakkan ligg ved Todalsfjorden på andre sida av Bjønndullu, og det kan vere lett å gløyme at også denne grenda høyrer til under Søyset.» Det er fire heimar i denne grenda, som altså ikkje er ein del av Nordvikstranda.

Måndag 17. oktober var det kløvertur på Kvennset og Todalshaugen. Sola skein da og, og turen starta frå Halsbua og utover til Småbåthavna. Deretter gjekk turen oppover skogsvegen langs Rossåa på Todalshaugsida.

Vi er heldige som har så varierte og fine turområde i nærområdet vårt!

Nettene er kalde, jul og vinter nærmar seg, men det blir kløverturar nokre gonger til før det blir vinterpause.