Surnadal demensforening og helselag ligg no i startgropa for å starte med eit nytt kor i Surnadal, og tenkje da på eit kor for menneske som lever med demens, fortel leiar i foreninga Liv Botten. Aller først vil ho lodde stemninga for eit slik kor, og inviterer til første oppmøte tysdag 9. september kl 17:00 på Frivilligsentralen på Skei.
Har du lyst til å bli med i eit slik kor, eller er du pårørande til ein person som har demenssjukdom, eller har du ein venn/venninne som du kan tenkje deg har lyst til å bli med – ein tidlegare kollega eller nabo eller nær sagt kven som helst – så kom og bli med, seier Liv.
Møt opp på Frivilligsentralen tysdag 9. september – det er da det skjer!
Musikk fungerer som ein kommunikasjonskanal med personar med demens, når språkfunksjonen blir svekka. Å synge saman, enten i kor eller mindre grupper, skaper gode opplevingar for den demensramma og frivillige. Forsking viser også at korsong kan redusere depresjon, betre livskvaliteten og gir ofte moglegheit til å oppleve meistring og fellesskap, fortel Liv
Derfor inviterast aktuelle personar samt pårørande og andre interesserte som kan tenkje seg å hjelpe til med dette til å møte opp. Songglede, fellesskap og gode stunder står i sentrum – her handlar det ikkje om prestasjon, men om å være i lag og oppleve musikken.
Rolf Arne Berg er alt hyra inn som dirigent for det nye koret, og pianisten er også klar – det blir Erkki Morten Klami. Dei to vil du møte og bli kjent med denne tysdagskvelden.
Arrangør er Surnadal demensforening og helselag – har du behov for meir info så treffer du Liv Botten på telefon 957 29 719.
Alle er hjarteleg velkomne!
