Todalen historielag inviterte laurdag på historisk vandring rundt på Øygarden på Nordvik. Rundturen får liksom ein heilt anna dimensjon når du får med kjentfolk som kan fortel om historia til både staden og folket. Med på denne turen var det fleire kjentfolk – vi kan nemne Sven Olav Svinvik, Rannveig Brøske, Anna Ingeborg Nordvik og Unni Tørset – og fleire til.
Det var mellom 30 og 40 som deltok på den historiske vandringa på Øygarden på Nordvik. Foto Jon Olav Ørsal
Vi starta ut frå forsamlingshuset og gjekk runden nedover bustadfeltet til hyttefeltet og innover til Isakbakkan og vidare om Tørsetbakkan og attende til Forsamlingshuset. Sven Olav losa oss nedover bustadfeltet og hyttefeltet og ga oss ein god innsikt i utbygginga av feltet som utløyste ein omfattande arkeologisk av området. Her har det nok vore stor aktivitet attende til både vikingtida og yngre jernalder – det er gjort gamle gravfunn og andre arkeologiske spor som mellom anna har ført til at ei område nærast sjøen er freda.
Vegen nedover bustadfeltet heiter Saltbuvegen og det namnet har den fått på grunn av at det var saltbuen nedmed sjøen her i vikingtida. Herifrå fekk folk vidt omkring tilgang på salt til konservering av mat. Det er spor etter aktivitet i området her heilt attende til 1700 f.kr. Vidare gjekk vandringa vidare innover til Isakbakkan og til Tørsetbakkan – her har det vore bufaste folk heilt til nyare tid, men plassane er no bruka til fritidsbustad. Anna Ingeborg Nordvik og Unni Tørset orienterte om husa og folket på turen rundt.
På tilbaketuren til Forsamlingshuset var det stopp på skuletomta på Øygarden. Rannveig Brøske orienterte om skulen på Nordvik og elles om husa og folket – og korleis det var å vekse opp på Øygarden. Det var mange som delte minner frå skuletida på Nordvik – mellom anna Ola Røe som gjekk 8 år på skulen her. Han starta skulegangen som 6-åring for å berge skulen frå nedlegging, og fekk altså eit år ekstra skulegang. Skulen på Nordvik vart lagt ned våren 1962 og var riven/brent i 1994. På det meste var det 45 elevar ved skulen på Nordvik.
Den historiske vandringa på Nordvik vart avslutta med samling i Forsamlingshuset, der grendelaget sørga for servering av kaffe og kaker og forfriskingar. Ingrid Bruset og Ragnhild A. Moe viste lysbilde med historiske bilde frå Nordvik før arrangementet vart runda av.
