Surnadal/Søya G16 tok måndag kveld imot Eide og Omegn FK til fotballkamp på ein regntung Søyabane. Surnadal/Søya er eit samarbeidslag og består av spelarar fødd i 2009 og 2010 frå heile Surnadal kommune. Søya/Todalen er representert på samarbeidslaget med Sigurd B. Kvendset, Marius Kvande, Erlend Polden, Olav Gjeldnes, Magnar Vikan, Trygve Aleksander Halle og Jens Sancho H. Ansnes.
Heimelaget pressar på. Foto: B G Ansnes
Ein kan trygt seie at vêrgudane ikkje varta opp med fotballvêr, for det regna heile første omgang, så da var det lita trøst i at det var opphald bortimot heile andre omgang, for da var alle allereie våte!
Heimelaget med corner. Foto: B G Ansnes
Kampen starta med eit kraftig press frå heimelaget, og allereie etter 4 minutt sette Brage Andersen ballen i mål for heimelaget. Heimelaget pressa på og skapte fleire store sjansar, og i det 15. minutt la Varg H. Sæterbø på til 2 – 0 for heimelaget. Bortelaget skapte nokre halvsjansar i perioden, men i det 24. minutt la Sigurd B. Kvendset på til 3 – 0, og berre to minutt seinare sette Even R. Haugen inn heimelagets fjerde mål. Bortelaget reduserte i det 31. minutt ved Lee Mathias Haukås, slik at det stod 4 – 1 til pause.
Eide og Omegn i angrep. Foto: B G Ansnes
Andre omgang var berre to minutt gamal når Brage Andersen starta andre omgang omtrent på same måte som første, med å score heimelagets femte mål i det 42. minutt. Etter dette vart det ikkje fleire mål, men båe laga hadde fleire store sjansar utan at ballen hamna i nettet. Så da dommar Kurt Einar Ansnes bles i fløyta for siste gong, så viste resultattavla 5 – 1.
Eide og Omegn prøvar seg enda ein gong, men heimelaget sitt forsvar klarerer. Foto: B G Ansnes
Neste kamp for Surnadal/Søya er mot Molde 2 i Molde den 18. mai.