Onsdag tok Søya/Todalen sitt J9/10 lag turen til Grøa stadion for å spele kamp mot Grøa. Kampen vart spela i det som må kallast «ekte nordmørsk» septembervêr, regn og litt vind.
I første omgang var det bortelaget som starta kampen klart best og hadde fire store sjansar, men måtte konstatere at ingen av dei vart teljande i målprotokollen. Så var det Grøa sin tur til å ha fire store sjansar, og dei greidde å få ballen i mål på alle sine. Fotball er ikkje alltid rettferdig!
I andre omgang var det ingen av laga som klarte å få overtaket i banespelet, men spelet bølga fram og attende med fleire store sjansar til båe lag.
Trenar Jens Nervik er likevel særs nøgd med utviklinga til laget. Laget har blitt mykje flinkare til å gå etter ball og fysisk sett har spelarane utvikla seg mykje sidan starten på sesongen. Gledeleg var det og at laget før kampen hadde fått ei «ny-signering» i Martine T. Øyen, spela sin første kamp for sesongen. Dette gjer at laget no har fullt mannskap. Dette lover godt for dei siste tre kampane.
Klare til kamp på Grøa. Foto: Anne Hjørdis C. Telstad
Desse spela kampen for Søya/Todalen: Mia Kvande, Anna Vikan, Martine T. Øyen, Sigrid N. Grønnes, Signe Stenberg, Oda Helene Kvendset og Natalie Astrid Brusethaug.
Torsdag 24.september kl. 18:00 spelar laget heimekamp mot Surnadal på Bordholmen.