I Smålandsgrenda er det stor aktivitet på byggefronten. Nerbøen (Skortinn i daglegtale) er under omfattande restaurering, og blir etterkvart mesta som ny. På nabotomta Midtbø (Stuå i daglegtale) er det nybygg på gang – og travelt var det på begge byggeplassane. Kåre Stenberg mura nye murpiper over det nye tretaket i Nerbøen, og i Midtbø vart det klargjort for støyping av ringmur og plate for å sette opp nytt elementbygg. 
I Midtbøen er det Steffi og Carsten som har starta arbeidet med nybygget. Dei gamle husa vart rive og brent i fjor haust. Etterpå er tomta rydda og klargjort for nybygg. I det fine vårvêret dei siste par vekene er det no klargjort for å støpe ringmur og plate ein av dei første dagane. Etter påske vil arbeidet med nybygget starte på, og med elementbygg frå MøreTre vil ein få tett bygg i løpet av nokre dagar. Carsten reknar med at det blir haust før han og Steffi kan flytte inn i nytt hus.
Her blir det nok ikkje golvkaldt! Gunnar Nordvik og Lars Kvendset legg isopor som skal støypast ned, under sålen. Foto: Jon Olav Ørsal
I Nerbøen er det Toril Redalen og Eduardo Ortega som no rår grunnen. Gjennom vinteren har husa gjennomgått ei omfattande renovering, både utvendig og innvendig. Utvendig er det nytt tak, nye murpiper og delvis nye vindauge og kledning. Innvendig blir det også mykje nytt. Toril og Eduardo reknar med at det skal være klart til flyttesjau i overgangen mellom vår og sommar ein gong.
Eduardo frakta murstein til muraren. Det er nok fin oppkjøring til Birkebeinerrennet i helga, der Eduardo skal delta. Foto: Jon Olav Ørsal
Kåre Stenberg sørgeer for at det blir nye murpiper. Foto: Jon Olav Ørsal
Klargjøring for støyping av ringmur og plate. Carsten og Arne Gjeldnes (i gravemaskina) Foto: Jon Olav Ørsal