Det var sjølvsagt Todalen Sanitetsforening som stod som arrangør for førstehjelpskurset som var arrangert i Ungdomshuset måndag kveld, og høvet var Sanitetens veke som i år har førstehjelp for eldre som tema. Ut over eigen nytte så var kurset også aktuelt for pårørande og kanskje også for naboar?
Kjente symptom som er tegn på at ting ikkje er heilt bra og treng aksjonering.
«Ikke vent og se, men ring 1-1-3»
Det var sett fokus på at ein skal lære seg å ta kontakt med helsehjelp når ein oppdaga symptom på sjukdom hos folk. Mange har så tradisjonelt så stor respekt for å tilkalle hjelp at det rett og slett blir for seint. Da er det betre å ringe ein gong for mykje enn ein gong for lite.
På kurset var det mykje fokus på kjente sjukdomar som slag, hjarteinfarkt og hjartestans. I Noreg er det rundt 12 000 slag og eit liknande tal for hjarteinfarkt kvart år. Vi fekk lære symptoma på dette og elles generelle symptom som det kan være lurt å reagere på med å kontakte AMK-sentralen.
Karen Johanne Talgø testar kunnskapen på hjarteredning. Foto Jon Olav Ørsal
Elles snakka kurshaldarane varmt for «Hjelp 113»-appen som alle burde ha – ved å bruke den får du heile tida hjelp og støtte etter at du har ringt 113. Hovudbodskapen var eigentleg at dei ufarleggjorde både bruk av hjartestartar og det å ringe 113 når du treng hjelp eller når du er usikker. Elles var det også mange gode tips å få for hjelp til sjølvhjelp i kvardagen.