Den 14. oktober i 1980 var den første elgen felt i Todalen. Det var ein elgokse, og den vart felt innmed Falla i Gammelseterdalen, innafor Kårvatn. Det var Ragnar Halle som felte elgoksen som var 324 kg i slaktvekt. Elgoksen var slakta og partert på staden, og frakta heim til Kårvatn med ryggsekk.
Dei var eit jaktlagt på 4, som bestod av Erik Kårvatn, Leiv Liaskar og Harry Kolstad i tillegg til Ragnar. – Det høyrer og med til historia at det i same jaget vart skote ei elgku litt lenger uti Gammelseterdalen, der ein av jegarane satt som bakpost under jaget. Det vart litt av ei arbeidsøkt for å berge heim kjøttet, minnes Ragnar.
No hamnar geviret, som er montert på ei plate, i lag med Trollheimsutstillinga på veggen i den historiske avdelinga på Gammelfabrikken.