Fjellgruppa tok turen til Ørnnebba

Tysdag tok Fjellgruppa i Surnadal Pensjonistlag turen opp til Ørnnebba ovanfor Nordvik. Fjellvandrarane køyrde opp Blomlivegen og parkerte ved inntaksdammen, 380 meter over havet.

Derifrå starta dei 35 pensjonistar, som i følge rapportane er ny rekord, på turen opp Blomlia mot målet, Ørnnebba. – Stien var merka og gjekk i myrterreng, fortel Anne V. Einum i Fjellgruppa. 

– Utan overdrivelse, ein «kjøle» bratt sti! Så det var godt å kome opp på fast berg og fjellplattå, men vi fekk i alle fall att for strevet, fantastisk utsyn over fjell, fjordar, og ikkje minst den vakre Nordvikstranda!, fortsett ho. 

– Vi tok ein velfortent lang matpause like under toppen  av Ørnnebba, 674 moh, fortel Anne. 

På nedturen tok fjellgåarane, under guiding frå Ingrid Nordvik ein liten avstikkar bort til der Svinviksetra (Nysetra) låg.  

Fjøset her vart bygd i 1906, og seterskjelet i 1910. Men setra fekk hard medfart vinteren 1953, da eit snøskred tok med seg seterfjøset. Siste setring på Svinviksetra vart da i 1952. 

I 1977 gjekk det eit nytt stort snøskred, men denne gongen eit godt stykke unna setra, men vindgufsen frå skredet var så kraftig, at seterskjelet blas over ende. – Det einaste vi kunne finne etter setertufta, var ei grå. gammal gjerdepåle, fortel Anne 

– Det kunne vore fint for ettertida at denne setertufta hadde vorte merka og fått ei lita tavle om Svinviksetras historie og lagnad, avsluttar Anne. 

Også på denne turen hadde fjellvandrarane vêrgudane med seg, med sol og varme på heile turen. Men på bilturen heim, kom styrtregnet! Griseflaks!, heiter det i rapporten frå turen.