Fjellgruppa tok turen til Møkkelfjellet

I går gjekk Fjellgruppa i Surnadal Pensjonistlag sin tur til Mekkelfjellet i Heim kommune. Turen starta frå Fjærli I Valsøyfjorden. – Først på ein sti opp gjennom tett skog, og deretter på god skogsveg som førte oss fram til Fjærlisætervatnet, kan Anne V. Einum i Fjellgruppa fortelje. 

Ved Fjærlihytta tok fjellvandrarane sin første matpause i sola. – Turen gjekk så vidare på ein sti med behageleg stigning oppetter fjellsida, held Anne fram. 

– Det siste stykket opp til toppvarden var skikkeleg bratt, men heldigvis ikkje lang!, seier ho. 

Frå toppen av Møkkelfjellet på 633 moh, fekk dei eit flott og vidt utsyn i alle himmelretningar, med fjell, vatn, fjordar og øyer! Rapportane seier at dei faktisk såg heilt til Hitra! 

På toppvarden vart det ein lang og god kvil med mat. ved toppvarden. – Og enno ein gong var vi heldig med veret, ja griseflaks, opphald og mykje sol på heile turen, kan Anne nøgd konstatere.

– For på bilturen heim kom regnet, avsluttar ho. 

Rapportane frå turen seier at alle dei nitten tykte det hadde vore ein overlag fin tjelltur.