I går gjekk Fjellgruppa i Surnadal Pensjonistlag sin fjelltur til Snøfjellet i Kvenndalen. – Så skulle vi få enda ein fin turdag med opphaldsver innimellom alle regndagane vi har for tida!, seier Anne V. Einum i Fjellgruppa.
Start frå Kvenndalen. Foto: Anne V. Einum
– Vi køyrde oppi Kvenndalen og innover før vi i alt 24 pensjonistar med godt mot, starta på turen opp til Snøfjellet 1009 moh, kan Anne fortelje.
Lars Gudmund fortel gode historier. Foto: Anne V. Einum
Turen opp til toppvarden er på 4,5 kilometer, og turen har ein høgdeforskjell på 600 meter.
Endeleg nærmar vi oss toppen. Foto: Anne V. Einum
– Så det var både langt og bratt nok! – Og for mange av oss oppi åra, kan det også by på utfordringar med bratte nedoverbakkar! – Men eg vil tru at alle fekk god utteljing med god mosjon i vakker natur og godt selskap, fortsett Anne.
Toppvarden på Snøfjellet 1009 moh. Foto: Anne V. Einum
Lars Gudmund Røen var med som kjentman, og han hadde mykje interessant og artig å fortelje frå Kvenndalen. På Kavalemmen, der det gamle dagar var markaslått, fekk fjellgåarane også greie på kva ordet «kavalem» kjem av. Gode historier frå Hans Hyllbakk si vandring i fjellheimen fekk dei også høyre.
Klar for bratt nedtur. Foto: Anne V. Einum
– Vi tok to matpauser på turen, og det var klokt!, legg anne til.
Nedtur med vidt utsyn. Stangvikfjorden bakerst. Foto: Anne V. Einum
– Takk for nok ein fin turdag!, avsluttar ho.
