Onsdag kveld møttest ivrige turgåarar ved Hals, veret var godt, men sola heldt seg bak skyene. Vi fylte opp bilane og kjørte til Nordvik. Uti Rabbå tok vi opp skogsvegen og samlast på lunningsplassen, 16 personar i alt.
Pustepause ved enden av skogsvegen. Foto: Dordi J H
«Kjentmenn» på turen var to spreke damer, Ingrid og Jorunn Nordvik. Turen gjekk først etter skogsveg, deretter god og tydeleg stiga, innimellom litt bratte parti.
Utsikt mot Nordvik og Drøppingstranda. Foto: Dordi J H
Svært fin utsikt det meste av turen, først mot Nordvik, Drøppingstranda og innover mot Todalsfjorden. Oppe på toppen såg vi utover Stangvikfjorden, Neslandet, Ålvundfjorden,Kvanne, Strengen, Lykkjebygda og Lykkjeeidet. Åsbøsnyta er 619 moh. Dette er ein riktig fin tur som passar både til roleg trim og til trening.
Utsikt frå toppen, Lykkjebygda, Røen og Kvanne fremst. Foto: Dordi J H
Fornøgd turgjeng. Fremst frå venstre: Ottar Halle, Anders Todalshaug, Marit Sanden Søyset og Sigrun Ørsal. Bak frå venstre: Steffi Bohle, Liv Ellen Røv, Sissel Ingjerd Redalen, Nikolay, Anne Søyset, Ingrid Nordvik, Magne Søyset, Erling, Jon Bruset, Ine, Ingrid, Jorunn Nordvik og Arndis Søyset. Foto: Dordi J H
Spesielt i fjellet i år er dei store mengdene av kvit og fin myrull – dei lyser opp!
«Mellom brune rastar står myrull kvit og skin.» Foto: Dordi J H
Dette var siste fellessturen i regi av trimgruppa før sommarferien. Men når det lir ut i august, kan det bli nye turar, det er berre å følgje med på Todalen.no.
I alle fall har vårturane vore trivelege og fine, det er kjekt å gå på tur i lag!
Søya er reine beinvegen. Foto: Dordi J H