Fin og triveleg jubileumsfest for 50-årskonfirmantane

Laurdag kveld var det fest for å feire dei som vart konfirmert i Todalen kyrkje våren 1970. Festa var i Todalen ungdomshus og  7 av dei 10 som vart konfirmert, av dåverande sokneprest Karl Kristian Jacobsen våren 1970, hadde teke turen for å vere med på jubileumsfeiringa. Sjølv om dei gjeldande smittevernreglane i samband med Koronasituasjonen inneber strenge restriksjonar, greidde Todalen sokneråd å lage ei fin og triveleg jubileumsfest for 50-årskonfirmantane og dei andre frammøtte òg i år. 

Totalt 22 gjestar hadde teke turen til ungdomshuset for å vere med på feiringa av årets 50-årskonfirmantar. Leiar i Todalen sokneråd, Kristian H. Gjeldnes, ønskte velkommen og leia oss gjennom festkvelden. 

Første post på programmet var festmiddag. Her vart det servert røkt svinekam med grønnsaker, poteter og saus. Etterpå viste Ingri Bruset og Ragnhild A. Moe fram bilete frå ca. 1955 og fram til 1970, altså perioden frå då årets konfirmantjubilantar vart fødde og fram til dei vart konfirmert, våren 1970. 

Etterpå var det quiz der det vart delt opp i tre lag. Resultatet frå quizen vart at alle tre laga fekk 13 poeng og dermed vart ALLE vinnarar. 

Til slutt vart det kaffe, twist og marsipankake. Under kaffen var det loddsal til inntekt for soknerådet sitt arbied. 

I morgon er det gudsteneste med hausttakkefest klokka 11 i Todalen kyrkje.