Fin og lun advendtstund på Evenshaugen

I går kveld inviterte Foreldrearbeidsutvalet (FAU), elevane og dei tilsette ved Todalen og Stangvik oppvekstsenter på Evenshaugen foreldre og søsken til adventstund. Elevane, med hjelp frå lærarane, hadde laga underhaldning med sketsjar, dans og songar, der temaet sjølvsagt var jul, og som dei framførte under adventstunda.  

Magnar og Trygve Aleksander var kveldens konferansierar og guide oss sikkert gjennom programmet.  

Først ute var første og andre årstrinn. Dei song songen «Jul i Svingen».

Så var det fjerde årstrinn som framførte sketsjen «Den lure nissen».

Femte årstrinn song og dansa.

Sjette årstrinn framførte tre sketsjar og ein song.

Sjuande årstrinn, som hadde si siste adventstund ved Evenshaugen før dei flyttar til ungdomsskulen, framførte, saman med tredje årstrinn, sketsjen «den tause julenissen» og song «Glade jul».  

Til slutt song alle elevane eit julepotpurri av Wenche Myhre, som sette eit verdig punktum på ei bra og variert underhaldning.

Etter at programmet var ferdig, vart det servert kaffe, saft, mat og julebakst. FAU hadde ordna med kaffe og saft, medan det var foreldra som hadde med mat og julebakst. Det var også loddsal, der inntekta gjekk til FAU sitt arbeid. Ei fin og lun adventstund på Evenshaugen vart avslutta med loddtrekning.