Kirkens Nødhjelp sin årlege «fasteaksjon» står for døra, og med ei verd som er urolegare enn på lenge, med krigar, konfliktar, politiske spenningar og klimaendringar, så er vår hjelp gjennom å bidra til innsamlingsaksjonen viktigare enn nokon gong!
Krigane i Gaza og i Ukraina har prega nyheitsbileta lenge. Rapportar om tørke, flaum, brannar og rekordheite kjem stadig, og frå mange kantar av verda. Samstundes går ei rekkje enorme humanitære kriser vi knapt høyrer om, føre seg, som krigen i Sudan. På toppen av dette ser vi no dramatiske kutt i bistand til verdas fattige frå den største bidragsytaren av alle, USA.
Det er lett å bli motlaus, men det er nettopp i desse dagar ein må samle alle gode krefter og gjere kva vi kan for dei mest sårbare. Ein har gjennom Kirken Nødhjelp sin årlege «fasteaksjon» høve til å bli med på å gjere ein forskjell! Den nest største bøsseaksjonen i landet er i gang – Kirkens Nødhjelp sin «fasteaksjon».
To veker før påske, kvart einaste år, går rundt 40 000 bøsseberarar frå dør til dør over heile landet og samlar inn pengar til Kirkens Nødhjelp sitt arbeid. I fleire tiår har norske konfirmantar vore med på denne enorme dugnaden, som gjer det mogleg å rykke ut til krisar.
Sokna i Surnadal skal samle inn pengar til «fasteaksjonen» tysdag 08. april frå klokka 17:00. Så da vil årets konfirmantar eller andre frå sokna kome på døra for å samle inn pengar til årets «fasteaksjon».
Med pengar frå denne innsamlingsaksjonen har det vore mogeleg for Kirkens Nødhjelp å vere til stades for millionar av menneske som treng det mest.
Kirkens Nødhjelp nådde til dømes ut til over ein halv million menneske i Gaza i fjor med mellom anna vatn, mat og hygienepakkar. Dei deler ut naudhjelp til krigsofre i Sudan, og i Ukraina bidreg dei mellom anna med vatn, arbeid knytta til mental helse og gjenoppbygging av infrastrukturen.
Foto: Kirkens Nødhjelp
I Zambia og store delar av sørlege Afrika har det vore ei langvarig tørke. Mange avlingar har kollapsa, men menneska som fått tilgang til vatn og lært klimasmart landbruk, har likevel klart å dyrke mat. Blant dei er Prevencia på 13 år og familien hennar, som Kirkens Nødhjelp har møtt i samband med «fasteaksjonen».
Fordi dei har klart å dyrke grønsaker, har dei unngått svolt, og dei har fått inntekter. Difor har tenåringen fått både sko, klede og skulebøker av mora si.
Takka vere det store engasjementet til konfirmantar og kyrkjelydar, kan menneske få eit betre liv.
– Vi ser at det nyttar! Vi håpar du og vil vere med på å gjere ein skilnad!, skriv lokal leiar for fasteaksjonen i Surnadal, diakon Gro Hauge Venås.