Ordførar Hugo Pedersen åtvara mot at folk sjølve skal starte rydding av trefall etter stormen «Amy» som herja i helga. I dag starta ryddearbeidet i stranda utafor Todalshaugen med mannskap frå Veidekke og Svorka som var forsterka med gravemaskin med tømmerklo og hogstmaskin/lastbærar med Lars Bjarne Mauset attafor spakane.
Lars Bjarne Mauset var henta inn frå hogstarbeid på Kårvatn med si hogstmaskin – Asbjørn Gjøvik frå Alf Engen sørga for transport. Foto Jon Olav Ørsal
Jobben i dag blir å rydde både langs vegen og langs kraftlinja – tømmer og buskas som berre var rydda ut av vegbanen for å få opna vegen så snart som muleg. I dag vil det tømmer og buskas bli rydda og køyrt vekk, samtidig som dei skal ta vekk tre som står klare for fall i neste storm.
Nokre tre stod for fall ved neste storm – disse vart rydda vekk samtidig med oppryddinga. Foto Jon Olav Ørsal
Det lønner seg difor å være litt oppmerksam på at det innimellom kan bli litt ventetid utover dagen, men vegen er ikkje stengt i samband med ryddearbeidet. Da er det lurt å legge inn litt ekstra tid dersom du skal nå ferja – eller har time hos tennlegen.