Dagens gudsteneste var tillyst i Svinsviks arboret, men på føremiddagen i dag var det godt med regn, og soknerådet beslutta at gudstenesta skulle flyttast til kyrkja. Og bra var nok det, for det regna bra da gudstenesta starta. Litt synd var det sjølvsagt, for førebuingane for utegudsteneste var gjort, men vêret er det da ingen som rår med. Det var Mørebiskopen Ingeborg Midttømme som var dagens liturg, og resten av mannskapet var også basert på «reservestyrker».
Dåpsbarnet Hennie Sæter Sandland saman med foreldre, faddrar og biskop Midttømme og klokkar Bøe. Foto Jon Olav Ørsal
Bernt Bøe var organistvikar, Kristian Settem var vika for kyrkjetenaren, Randi V. Bøe var klokkarvikar – men kyrkjevertane var Kristian Gjeldnes og John Moe frå Todalen sokneråd. I dag var det også dåpshandling under gudstenesta – det var lille Hennie Sæter Sandland frå Surnadal som var båret til dåpen, og som vart oppattkalla etter oldemora.
Deler av P17koret var med og forsterka salmesongen i kyrkja i dag. Foto Jon Olav Ørsal
Det var forresten flott salmesong under dagens gudsteneste, der deler av P17-koret var med som forsongarar og dermed forsterka salmesongen under gudstenesta. Midttømme tok i si preken utgangspunkt i ekstremvêret den siste tida og i bibelteksta at ein ikkje skulle bekymre seg for morgondagen.
Neste gudsteneste i Todalen er ikkje fostsett, men vil bli kunngjort i god tid, og klokkaren oppfordra kyrkjelyden til å ta del i kyrkjevalet på valdagen 11. spetember. Gudstenesta vart runda av med Todalssongen, og etterpå var det kyrkjekaffe.
Etter gudstenesta var det kyrkjekaffe – kyrkjevertane John Moe og Kristian Gjeldnes stod for serveringa. Foto Jon Olav Ørsal
Frå dagens gudsteneste i Todalen kyrkje – foto Jon Olav Ørsal