Benk til strandpromenaden rundt Akershus…

På Ansnessaga er dei vant til grove dimensjonar på produkta dei lagar. Da vi stakk innom på fredag, var Ivar Bolme og Råg Mikkelsen i gang med å ta ut ferdigtørka materialar frå tørka. Ein av stokkane utmerka seg med tanke på dimensjon, for det er liksom ikkje kvardagskost med skurlast på 12 x 16 tommar.  Dette er på langt nær nokon rekordstokk, men likevel har den ei lita historie.

Stokken er levert frå Hjellnes, og hatt tilhald i tørka nærare 3 veker, før han no kom ut ferdigtørka. Den skal leverast til Solem sag i Øvre Surnadal, som ein del av ein leveranse dei har til prosjektet Nordre Akerhus Kai i Oslo. Solem sag skal i første omgang levere eit 50-tal benkar, der to og to slike stokkar skal boltes saman til benkar. Georg Solem fortel at dei har samla på grove og rette stokkar i årevis for å sikre seg at dei har nok til denne leveransen. – Dette prosjektet er ei renovering av området mot Akershus festning og skal etter kvart bli ein slags strandpromenade. Etter plana skal heile dette etter kvart oppgraderast, og denne leveransen er berre første del av eit større prosjekt.