Snart er det klart for årets happening for dei som skal konfirmerast, sjølve konfirmasjonsdagen. Konfirmantane har jamnleg hatt undervisning i samband med den kommande seremonien, og er no inne i aller siste fase. Så når det er gudsteneste i Åsskard kyrkje førstkommande søndag kveld kl 19.30 , er det med unge aktørar i teneste. Her vil konfirmantane frå Stangvik, Todalen og Åsskard utføre både liturgi og musikk.
På plakaten står det «Ungdomsgudsteneste» – i mangel av betre namn, skriv Bernt Bøe som har delteke i årets konfirmantundervisning. Teamet er ivrige på å understreke at sjøl om konfirmantane utfører mykje av tenesta, med litt assistanse av Bernt Prest og Bernt Organist, er dette er søndagens messe, og den er for alle!
![Med unge a Konf BAND aassk 090415](http://todalen.no/wp-content/uploads/2015/04/Med-unge-a-Konf-BAND-aassk-090415-430x279.jpg)
Bandet under øving i Åsskard-kyrkja. Frå venstre Erik, Per Emil, Bernt Organist, Eirik og Torstein. (Foto: Konfirmant Elida)
Dei tre temabolkane Skapinga, Boda og Nåden blir alle illustrerte med lysbilete – delvis laga av konfirmantane sjøl. Til salmesongen spelar «konfirmant bandet» – med gitar, piano, trommer og bass.
Etter gudstenesta «Med unge – for alle» blir det servering i Kyrkjestua.