Årnesdag med interessant program, stort oppmøte og god servering

Det var fullt hus i den gamle skulstuå på Årnes da Svein Aarnes ønskte vel møtt til den femtande Årnesdagen.

Svein fortalde litt om grenda. Her var det i gamle dagar klyngetun med to og to våningshus som var bygde saman. I 1880-åra vart det starta stor byggeaktivitet, alle gardane med fjøs og uthus vart flytta til nye tomter. Dette var store investeringar, så det passa riktig godt at den velståande engelskmannen John Musters kom til Årnes. I følge historia hadde John Musters tenkt seg til Harangen, men sjøis gjorde at han måtte gå i land på Årnes. Han bygde Årnestrøinn, leigde arbeidsfolk og betalte godt. John Musters hadde tent seg rik på kolgruvedrift i Nottingham. Han og kona Polly fekk elleve barn. James var den yngste av borna.

Lars Gudmund Røen heldt eit interessant foredrag om familien Musters med fokus på James (Jim) Lawrence Chatworth-Musters (1901-1948). Jim var amatørzoolog, hobbybiolog,  eventyrar, militær, etterrettningsoffiser, krigshelt og original. Han var med på mange ekspedisjonar i fleire verdsdelar.

James Musters var levande interessert i natur, han registrerte seks nye fugleartar i Norge og nye museartar. Eit av dekknamna han hadde under krigen var «Dr. Mouse», og aksjonar han planla hadde namn som «Albatross», «Pingvin» osb.

Da andre verdskrigen braut ut, var James i Bergen der han etablerte ei etterretningsgruppe. Han måtte rømme landet, og etter ei slitsam ferd i lag med legen Kvittingen kom han seg over til Shetland den 13. mai. Han vart med i den norske motstandsrørsla. Han var med på å opprette Kompani Linge, han deltok i fleire sabotasjeaksjonar og han samarbeide med den norske regjeringa i London. Han fekk medalje frå Kong Haakon som takk for krigsinnsatsen.

«Naturen er Vår Herres helsestudio!»

Det var utgangspunktet for biletkåseriet til Bernt Bøe: «Bilete frå fjell og fjord». Bernt Bøe har stor kunnskap om lokalhistoria, og han er ein utruleg dyktig formidlar. Han krydra biletkåseriet med anekdotar og gode forteljingar.

Heggem er eldste garden i Bøfjorden. I 2019 vart det bygd eit minikraftverk i Heggemselva

Han fortalde om «Mannbjønnen» som drap fem menneske i Bøfjorden. Det gjer vondt å høre om jenta som sprang tre rundar rundt eit einerkjerr før bjørnen slo kloa i ho. Ho hadde med seg bundingen sin, og det var tre omgangar med tråd rundt kjerret.

Hjelmen er eit kjent fjell i Settemsdalen, her er det fint terreng for turar både vinter og sommar. I Hjelmkånnå (Hjelmkona) var det gruvedrift etter krommalm. Gruvedrifta starta opp ca. 1800 med gruvearbeidarar frå Røros.

Bøfjorden er eventyrbygda med namn som «Trollbakkan» og «Tussan». Ein mann som møtte bjørnen uttala følgande: «Bjønn vifta med labben og eg med øksa!»

I Båtvika er det funne fire høvdinggraver frå bronsealderen. Båtvika er også «vegkrysset» mellom fire fjordar. Her var det båten til Martinus Bøe forliste i 1909. Yngste sonen var ikkje døypt enno så han fekk namnet Martinus Ole Kristian etter dei tre som omkom.

I pausen var det servering med eit stort utvalg av gode kaker og loddsalg!

Fleire bilete Årnesdagen: