17.maigudsteneste i Todalen kyrkje

17.mai var det, tradisjon tru, 17.maigudsteneste i Todalen kyrkje. Torbjørn Brøske var hyra inn som prest, medan Ronny Kjøsen trakterte orgel og trekkspel. Rundt tretti personar hadde møtt fram, så det var ikkje noko problem å handheve smittevernreglane. Leiar i Todalen sokneråd, Kristian H. Gjeldnes, ønskte kyrkjelyden velkomne til 17.maigudsteneste.  

Torbjørn hadde fått med seg årets konfirmantar og Gudmund Husby til å lese under dagens gudsteneste. Dette gav ei fin og verdig ramme rundt den kyrkjelege delen av nasjonaldagsfeiringa. 

Dagens tekst var henta frå evangeliet etter Matteus kapittel 22, versa 17-22.

Torbjørn etterlyste i preika si eit mykje sterkare og tydelegare samfunnsengasjement frå kyrkja si side i viktige samfunnsspørsmål. Sidan slutten av 90-talet har kyrkje vore nærast usynleg og tause i samfunnsdebatten, meinte han. Der kyrkja tidlegare var ein synleg og viktig debatant og i samfunnsdebatten, har kyrkja dei siste tiåra vore særs tause og fråverande i slike saker, avslutta han. 

Dagens takkoffer gjekk til Todalen Senitetsforening sitt mangfaldige arbeid i Todalen. 

På morgonen, før biltoget, la John Moe frå Todalen Historielag, på vegne av Surnadal kommune, ned krans ved Krigsminnebautaen ved kyrkjegarden.