Nærbutikkar over heile landet oppfordrar bygdefolk til å handle meir lokalt. Laurdag 1. november blir det landsomfattande aksjonsdag for lokal handel på Matkroken Todalen. «Handle lokalt – velg nærbutikken» er slagordet for kampanjen, som blir arrangert i samarbeid med det statlege Merkur-programmet for distriktsbutikkar.
Merkurprogrammet fokuserer på kor viktig det er å handle daglegvarer lokalt. Foto: Jon Olav Ørsal
Kampanjen vil fokusere på kor viktig butikken er både som møteplass, servicesenter og salsstad for daglegvarer. Målet er å redusere handels-lekkasje og stimulere til meir lokal handel. – Når du handlar lokalt, er du med på å oppretthalde nærbutikken og eit levande lokalsamfunn. Vi ønskjer å takke kundane for at dei sluttar opp om lokalbutikken. Samtidig vil vi utfordre dei som handlar lite lokalt, til å tenkje over kva butikken betyr for bygda, seier kommunikasjonsrådgivar Per Kjetil Jørgensen i Merkur.
200 over heile Norge deltar i kampanjen for lokal handel. Terje Nordvik på Matkroken Todalen fortel at dei skal servere gratis kaffe med graut og bakels denne dagen. I år som i fjor har dei hyra inn Karen Johanne Talgø til å halde vaffelpressa i aktivitet frå klokka 10 og ut dagen. Terje håpar at folk stikk innom, slik at det blir ein travel dag både for Karen Johanne og resten av betjeninga.
Laurdag held Karen Johanne vaffelpressa varm frå kl 10 og ut dagen. Arkivfoto: Jon Olav Ørsal
– Merkur jobbar for å utvikle daglegvarebutikkar i distrikta slik at dei kan gi eit best mogleg tilbod til kundane sine. Men det er like viktig at folk som bur på bygda, brukar lokalbutikken sin i størst mogleg grad. På den måten kan vi halde oppe levande lokalsamfunn. Utan butikk er det vanskeleg å få til vekst og tilflytting i ei bygd, seier Per Kjetil Jørgensen i Merkur.