Foto: Jo Gjeldnes
Hopp under nyhetssakene
Elias  og  Epos  besøker  Bøfjorden

Elias og Epos besøker Bøfjorden

Elinor Bolme Tysdag 10. september 2013

Ilabukta på Bølandet er arena for familievennleg fellesprogram søndag føremiddag:Her blir det både kjøring av den populære barnebåten «Elias», jubileumsbesøk av bokbåten «Epos» og servering av ymse slag.

Elias-kjøring frå kl. 11.00

Jenter og gutar i alderen 2 – 10 år får styre «Elias» rundt i hamnebassenget, med vaksen kaptein som sjef ombord. Flytebrygga ved Saga er utgangspunkt, der Ingrid og Kristin frå Redningsselskapet hjelper barna med flytevest og sikkerhetsutstyr. Elias-kjøringa varer til rundt kl. 13.00. Den er gratis.

Mat ved Saga

Attmed Saga har Bø Grendalag ein liten kafeteria, der store og små får kjøpt pølser, saft, kaffe og småmat.

Bokbåten «Epos»

Klokka 12.00 kjem bokbåten «Epos» til nabokaia ved Samvirkelaget. Bokbåten har 50-årsjubileum og markerer dette med barneforestilling når Elias-kjøringa er ferdig kl. 13.00. Artisten Torunn Tusj underheld med eit festleg program.

Bøker og ballongar

Bokbåten låner som vanleg ut bøker – naturlegvis til både vaksne og barn. I høve jubileet byr «Epos» også på planet-ballongar og andre artige ting for dei yngste. Av praktiske grunnar blir alt bokutlån unnagjort før jubileumsforestillinga.

Pilotprosjekt

Redningsselskapet («Elias») og Fylkesbiblioteket («Epos») lanserer med dette ein ny samarbeidsmodell ved å tilby komplett – og gratis! – aktivitetsdag for heile familien. Bøfjorden Historielag er lokal arrangør for pilotprosjektet og håpar sjølsagt på både godt ver og god oppslutning.

Program på museet

Sjøbruksmuseet er ope som vanleg. Og der vil Dagens Tema sjølsagt handle om både redningssak (i spøk og alvor) og litteratur – da med sterke glimt frå livet til sjøs.

Publisert: 10. september 2013, 12:56